Taas usab ang cost of dying

Adunay nakaplagan ang kapolisan nga lima ka lungon nga gibiyaan sa nagkalain-laing lugar sa Metro Manila.  Ang mga lungon adunay sulod nga papel nga adunay nakasulat nga mensahe nga Chinese Communist Party (CCP) Greedy (Hangol) ug “Hangol, dangan”.  Gikondenar sa Department of Foreign Affairs ingon man sa Chinese Embasssy ang maong hitabo.   Mahimo’ng tuyo lang sa nagpasiugda nga sugnoran aron mosilaob pag-ayo ang nagbaga na nga relasyon tali sa Pilipinas ug China.  Apan, matud pa sa usa ka observer, “Mahimo ra usab nga gipakita sa nagprotesta nga gawas nga taas na ang cost of living sa Pilipinas, taas pa gayod ang cost of dying.” Madahaan!

Dili na promo ang unli-rice

Matud pa sa Malacañang, ang paghinay sa ekonomiya sa Pilipinas sa 2ndquarter sa 2026 temporaryo lamang ug wala maghulagway long-term nga direksyon sa nasud.  Gitaho sa Philippine Statistics Authority nga 2.3% lang ang economic growth sa 2ndquarter, ubos gikan sa 2.8% sa nahauna’ng quarter.  Bisa’g asukalan pa sa Malacanang ang ilang pamahayag kabahin sa ekonomiya, ang kamatuoran nagpabilin nga nagping-it gihapon ang katawhan sa kamahal sa palaliton. Haum ang obserbasyon nga, “Kaniadto, ang unli-rice sa mga restaurants usa lamang ka promo, apan karon, nahimo na kining luho.” Fezteleern!

Ilampaso ang karibal

Nasikop sa CIDG-Mandaue Field Unit ang usa ka Chinese national ug na-imbargo usab ang mokabat P4 milyones nga kantidad sa peke nga seasoning product atol sa pagronda sa usa ka bodega sa Barangay Sto. Nino, Cebu City.  Adunay sumbong nga nadawat ang CIDG gikan sa usa ka food manufacturing company kabahin sa pagpamaligya sa peke nga food seasoning.  Tinuod gayod nga sa negosyo, walay higala o kaaway kon dili pulos karibal. Busa, tambag sa mga karaan’g negosyante, “Aron ka molampos sa negosyo, ilampaso gayod ang imong karibal.” Muleeng!

Bentaha ang kwartahan

Usa sa 18 ka kanhi former Marine bodyguards ang mitug-an nga gitanyagan sila’g tag-P20 ngadto sa P25 milyones bugti sa ilang pagbakwi sa ilang testimonya batok kang Presidente Marcos, Jr., kanhi Speaker Martin Romualdez, ug kanhi Ako Bicol party-list Rep. Zaldy Co.  Mahulagway nato kini’ng kahimtanga nga away tali sa gugma sa kamatuoran batok sa gugma sa kwarta. Sagad sa maong away, modaug gayod ang kwarta kay matud pa lage, “Ang datu ug pobre, managsama ra, apan bentaha gyud kon aduna kay kwarta.” Atala lagee!

Roosters with “small bolo”

Gireklamo sa usa ka Jennifer Torrevillas ngadto sa buhatan sa Ombudsman ang mga lokal nga opisyal sa Matag-ob, Leyte, lakip na ang hepe sa kapolisan sa lungsod, kabahin sa pagpahigayon og sultada kon cockfight atol sa fiesta sa lungsod sulod sa usa lamang ka “makeshift” nga buwangan sa Brgay. Bonoy.  Makapahinumdum sa polis nga nakadakop og nagtuki-tukis.  Sa pagbuhat niya sa iyang police report, nalimot siya kon unsay iningles sa tari. Busa mao kini ang migawas sa iyang report, “Confiscated two roosters with “small bolo” in their feet.” Pagkatoytoy!