Flood scam sa Sugbo
Nalipay unta ang mga Sugboanon nga usa ka tuig human ilusad ang imbestigasyon sa flood control scandal duna nay napasaka nga mga kaso sa gidudahang ghost projects sa Sugbo. Hangtod nga ilang nahibaw-an nga ang girekomendar nga mga kaso sa National Bureau of Investigation (NBI) wala pa diay masubli sa Department of Justice (DOJ).
Mahimong siyam-siyaman pa una mapasaka ang mga kaso ngadto sa buhatan sa Ombudsman. Ug posibleng mas laay pa gyod nga pagpaabot kanus-a masang-at sa Sandiganbayan aron maposasan ug mabalhog na sa prisohan ang mga gipasanginlan.
* * *
Laing makapaluya nga anggulo: Ang posibilidad nga ang duha ka proyekto nga wala igkita sa mga imbestigador sa NBI sa Singsing, Balamban nahinayon ug nahuman na gani sa pagtukod sa pikas nga barangay.
Mahimong wala lang mausab ang coordinates sa orihinal nga plano ngadto sa bag-ong lugar sa aktuwal nga implementasyon. O gisaag gyod ang NBI sa taga Department of Public Works and Highways (DPWH).
* * *
Maong nangandoy na lang ang nagpakabana nga mga Sugboanon nga dunay makasulti sa bag-ong liderato sa Senate Blue Ribbon Committee sa paglili sa kuwestiyonable nga flood control projects sa Sugbo.
Human nakahukom silang Committee Chairperson Erwin Tulfo ug Senate President Win Gatchalian nga itugyan na lang sa Ombudsman ang pagtiwas sa imbestigasyon sa gipasangil ni Senador Ping Lacson nga 32 ka ghost projects ug ilegal nga reclamation activities sa Taguig City nga giingong gikuhaan og hangtod sa 33% nga kickback ni Senador Alan Peter Cayetano.
* * *
Maayo na lang nga nakaduaw sa Sugbo gahapon si Ombudsman Boying Remulla. Hinaot nga dili ulog-ulog lang ang iyang gipahibawo nga imbestigasyon:
Nganong gibahaan gihapong Sugbo bisan sa P60 bilyones nga flood control projects sa niaging unom ka tuig;
Nganong mayoriya sa mga proyekto tua tukora sa ikapitong distrito sa Sugbo ug nasipong sa QM Builders ni Allan Quirante.
Hinaot dunay makahunghong ni Remulla ning nahipos namong posibleng katin-awan: Responsable sa nga kinadaghan og mga proyekto ang ikapitong distrito mao ang kanhi district engineer nga mao say kanhi DPWH 7 regional director nga si Danilo Villa; kinsa linudhan sa kasal ni kanhi Kongresista Peter Calderon; kinsa giingong usa sa labing suod nga politiko ni Quirante.
* * *
- Latest
