LeBron mopatim-aw sa New York, lagmit manghugyaw

CEBU, Philippines — Si LeBron James gikatakda nga molugwa didto sa New York kaduha ning semanaha sa Fanatics Fest, usa ka panagtapok sa mga sports fans diin lagmit mosulti siya kabahin sa wala pay klaro niyang ugma sa NBA.

Ang 41-anyos nga NBA all-time scoring leader nagkanayon nga dili na siya mobalik sa Los Angeles Lakers apan gusto pang moduwa sa ika-24 niyang season uban sa laing team.

Ang ahenteng si Rich Paul sa sayo pa mibutyag nga daghang NBA clubs ang naka-interes sa iyang kliyente, apil ang Miami Heat ug Cleveland Cavaliers nga parehong gihatagan ni LeBron og korona. Naglangkob sab sa listahan ang Philadelphia 76ers ug ang Golden State Warriors.

Ang four-time NBA champion ug four-time MVP nagplano og live recording sa iyang "Mind the Game" podcast karong Biyernes sa usa ka panagtigum didto sa Javits Center. Si Indiana Pacers star guard Tyrese Haliburton mao ang iyang co-host.

Unya sa Sabado sa hapon, si James mo-rekord sa iyang talk show nga "The Shop" sa maong festival.

Kon ugaling mo-anunsiyo si James sa iyang napilian alang sa bag-o niyang team sa maong kalihokan, dili na kini bag-o alang sa NBA superstar nga naanad nang manghugyaw pinaagi sa mainit nga video news.

Niadtong 2010, usa ka semana human nahimo siyang free agent pinaagi sa pagbiya sa Cleveland, si James mipatim-aw sa usa ka live ESPN special nga gitawag og "The Decision" diin iyang gipadayag nga mopirma siya og kotrata uban sa Miami Heat.

Si James nakig-alyansa nilang Chris Bosh ug Dwyane Wade sa usa ka superteam nga nakadaog og duha ka kampiyonato sa NBA ug milusad ni "King James" ngadto sa impresibong walo ka sagunson nga pagtikang sa NBA Finals.