Team Welec kampiyon sa Guadalupe
CEBU, Philippines — Ang Team Welec mipatikangkang sa Mighty Warriors, 79-67, sa ilang sangka sa final aron paglugwa nga kampiyon sa Guadalupe Inter-Commercial Basketball Tournament 2026 niadtong Sabado sa gabii, Hulyo 18, didto sa Barangay Guadalupe Multi-Purpose Gym sa dakbayan sa Sugbo.
Gihuman sa Welec ang upat ka adlaw nga torneyo bitbit ang perpektong 4-0 rekord aron sakmiton ang P150,000 nga premyo.
"Mapasalamaton ko sa Welec management led by our team owner Wendel "Boss Onto" Lecen, team manager "Badboy ng Cebu" Ed Tan, and manoy Roche sa opportunity to coach and deliver the championship in my very first attempt," matud pa ni Welec head coach Gary Cortes.
Gibandera nilang ex-PBA player Brian Heruela, kanhi Cebu Schools Athletic Foundation, Inc. (CESAFI) Most Valuable Players Kent Ivo Salarda ug Raul Gentallan, ug big man Ivan Clark Alsola nga maoy gipasidunggan nga Finals MVP, ang Welec sayong mikontrola sa duwa ug miligid ngadto sa 46-32 nga bentaha sa halftime.
Ang Welec nakasustinir sa ilang kainit aron inaton ang ilang labaw ngadto sa 16 puntos, 66-50, human sa tulo ka kuwarter.
Wala na molingi pa sukad niadto ang Welec aron epektibong silyohan ang double-digit nilang kadaogan.
Duna hinoon gihapoy angayan nga ikalipay ang Mighty Warriors kay mibulsa sila og P100,000 isip first runner-up samtang ang Tuburan 360 Coffee nakadawat og P50,000 human nila gipildi ang AMC Construction, 98-92, sa gubat alang sa ikatulong dapit.
- Latest
