Babaeng angkas todas, rider sugatan sa salpok ng SUV

MANILA, Philippines — Namatay noon din ang isang babaeng backride habang sugatan ang rider ng motorsiklo nang salpukin sila at takasan ng isang sport utility vehicle (SUV) sa tapat ng La Salle Greenhills,Ortigas Avenue, Mandaluyong City, boundary ng San Juan City, nitong Biyernes ng madaling araw.

Sa inisyal na ulat, nangyari ang insidente, alas-4:00 ng madaling araw sa nasabing lugar nang salpukin ang mga biktima ng isang puting Toyota Land Cruiser na kung saan tumilapon ang mga biktima.

Agad namang naaresto ng San Juan City Police ang lalaking driver ng SUV matapos umano nitong tangkaing tumakas at pumasok sa compound ng isang shopping center sa Greenhills.

Batay sa mga ulat, natuklasang tinakpan ang plaka at conduction sticker ng sasakyan ng sticker o logo umano ng House of Representatives.

Nai-turn over na ang suspek sa Mandaluyong City Police Station para sa pagsasampa ng mga reklamong reckless imprudence resulting in homicide at reckless imprudence resulting in physical injuries at damaged to property.