Dili makaka-on ang dili motambong

Gitataw ni Presiding Officer Senator Francis Escudero nga dili kinahanglan nga patambongon gayod si Bise Presidente Sara Duterte sa iyang impeachment hearing sa Senado kay gi-representahan na man siya sa iyang mga legal counsel atol sa hearing.  Gawas nga gitugot sa Senate rules, mahimo’ng tan-awon usab kini nga stratehiya sa depensa subay sa prinsipyo sa presumption of innocence.  Makapahinumdum sa akong silingan nga nag-agni sa iyang kumare nga senior citizen sa pagtambong sa ilang meeting. Kay nagmakuli man ang iyang gi-agni, iya kini’ng giingnan nga, “Kon di ka motambong Maré, dili ka makaka-on sa idalit nga snacks.”  Atala lagee!

Kaluy-i ang kahoy

Gisaway ni Bicol Saro party-list Rep. Terry Ridon ang mga kaalyado ni VP Sara Duterte nga mipasaka og petisyon sa Korte Suprema aron ipahunong ang impeachment dungan ang pag-ingon nga maluoy lang unta ang mga petitioner sa mga kahoy nga giputol aron himoong papel nga sulatan sa ilang petisyon.  Tipas man tingale ang panghunahuna ni Ridon ni’ng iyang pagpanaway.  Kon tinuod siya’ng nalooy sa mga kahoy, maayo tingale nga “dili na lang usab tubagon sa iyang mga kaalyado ang petition, bisan kon mandoan sila sa Korte, aron mapreserbar gayod ang mga kahoy.”  Madahaan!

Dili masayop

Gibarogan ni Senate impeachment court presiding officer Senator Francis Escudero ang iyang nahaunang ruling nga kinahanglan adunay 16 ka affirmative votes gikan sa mga senator-judges aron makonbikto sa VP Sara Duterte sa iyang impeachment trial.  Daw misamot na man kalisod ang pag-konbikto sa bise presidente.  Mora’g nasipyat ang mayoriya sa senado pag-agni ni Chiz Escudero nga mobalhin sa ilang kampo.  Laing sipyat mao ang pagtuboy kaniya isip presiding officer. Matud pa bitaw sa usa ka politiko, “Dili gyud ko makabuhat bisan usa lang ka sayop, kay sagad ako gyud ni dugangan og laing ikaduha, ikatulo ug ikaupat pa gani nga sayop.”  Fezteleern!

Mosukol ang dinaug-daog

Segun sa report sa Asia Maritime Transparency Initiative, nasayran nga ang nasud sa Vietnam nagtukod usab og mga military and logistical facilities sa mga reef nga gi-angkon sa Pilipinas isip kabahin sa Kalayaan Island Group sa West Philippine Sea (WPS).  Lain na usab kini kamatooran nga huyang ang kapasidad sa Pilipinas pagpanalipod sa iyang teritoryo ug soberiniya diha sa WPS busa kanunay lang kitang daog-daogon sa mga kanait nga nasud. Ning kahimtanga, makapangutana na kita nga, “Kanus-a pa kaha mosukol ang dinaug-daog?”  Muleeng!

Magpunay’g bantay sa baboy

Mi-imponer si Cebu Governor Pamela Baricuatro og 45 ka adlaw nga ban o pagdili sa pagpasulod sa mga baboy ug uban pa’ng pork products nga nagagikan sa Negros Island Region ug sa ubang probinsya nga apektado sa African Swine Fever (ASF). Dayag nga maapektohan niini ang suplay sa karneng baboy sa Sugbo.  Hinaut lang unta nga dili kini moresulta sa pagmahal sa maong commodity.  Matud pa sa akong amigo nga namuhi’g baboy, “Imbes magbantay kita sa dagan sa impeachment, magpunay na lang hinoon kita’g bantay sa atong mga baboy.” Pagkatoytoy!