Minivan vs truck: 2 Pakistani lasog sa Cebu
MANILA, Philippines — Patay ang dalawang Pakistani national matapos na magbanggaan ang sinasakyan nilang minivan at kasalubong na tractor head truck sa panulukan ng highway ng Brgy. Guizo, Mandaue City, Cebu, ayon sa ulat kahapon.
Kinilala ang mga nasawi na sina Fate Muhammad, driver ng Suzuki minivan at sakay nitong si Inayat Ullah; pawang 38-anyos.
Ang driver naman ng tractor head truck na nakabanggaan ng mga ito ay nakilalang si Samuel Chavez, 39 anyos ng Manapla, Negros Occidental.
Sinabi ni P/Lt Col. Mercy Villaro, spokesperson ng Mandaue City Police, nakapula ang traffic light nang biglang pumihit pakaliwa ang driver ng truck na nagresulta sa banggaan.
Sa lakas ng pagkakabangga, nayupi ang minivan na sinasakyan ng dalawang Pakistani na nagtamo ng matinding sugat sa kanilang mga katawan.
Ang dalawang dayuhan ay mabilis na isinugod sa pagamutan pero kapwa binawian ng buhay habang nilalapatan ng lunas.
Isinailalim sa kustodya ng Mandaue City Police ang driver ng truck na nahaharap sa kasong reckless imprudence resulting to two counts of homicide at damage to property.
- Latest
