Pinili nga hustisya

Giawhag sa Malacañang ang katawhan nga magma-igmat ug dili dayon magpahaylo sa pamahayag ni Bise Presidente Sara Duterte nga buot pahilomon sa administrasyon ang mga sakop sa oposisyon pinaagi sa pagpasaka’g kaso batok kanila.  Gihangop man sa katawhan ang pagpasaka’g kaso labi na niadtong aduna gayo’y kalambigitan sa anomaliya sa flood control projects.  Apan ang dili kaayo masabtan kay ngano’ng ang oposisyon ra man ang giuna pagtaral. Haum ang panultihon nga, “Ang pinili nga hustisya (selective justice) dili tinuoray nga hustisya kon dili, usa lamang ka matang sa pagpangdaugdaug nga pagabuhaton niadtong may kagahom pagsuwat og subpoena ug sa pagluwat og orden de aresto.”  Madahaan!

Emosyonal nga senador

Gisaway ni Karen Davila, usa ka beteranong broadcast journalist, ang mga senador nga nahimong emotional sa pagdakop ni Senador Jinggoy Estrada.  Alang kang Davila, mas maayo nga ipunting lang sa mga senador ang ilang simpatiya ug kaluoy ngadto sa mga nag-antos nga ordinaryong Filipino.  Dili ikahibulong ang pagka-emotional sa mga senador kay tungod sa atong kakulangon ug pagkamasalaypon, namugna ang atong pagbati sa uban. Apan daghan usab ang midapig sa mga pagsaway ni Davila tungod kay matud pa nila, “Dili angay kaloy-an ang senador kay dili ra man siya ang nahiagom sa maong kalisdanan.” Muleeng!

Palaaway nga bata

Gipalagpot sa iyang katungdanan isip kongresista Cavite 4th District Representative Francisco Barzaga tungod sa sala nga conduct unbecoming ug disorderly behavior.  Mahinumduman nga kritikal kaayo si Barzaga sa ubang sakop sa kongreso labi na sa isyu sa kurapsyon, butang nga wala ikahimuot sa ubang kongresista kinsa mitawag kang Barzaga nga “spoiled brat”. Makapahinumdum kini sa mga bata nga gipangutana sa inahan ngano’ng wala nila paapila pagdula ang iyang anak. Gitubag siya sa mga bata nga, “Dili namo siya pa-apilon kay palaaway man unya mangu-ot pa jud og panty.”  Samokaa!

Walay basurahan ang “mansion”

Mibalik na paghatud ang Cebu City government sa basura sa dakbayan ngadto sa pribadong landfill sa Aloguinsan, Cebu aron makunhoran ang nagkadaghan nga basura sa South Road Properties (SRP).  Sa kadako sa budget nga gikinahanglan ug sa kadaghan sa basura nga makolekta matag adlaw, angayan na tingale nga magtukod ang Cebu City og kaugalingon’g landfill ug dili kay makontento na lang sa paglabay sa basura ngadto sa laing lugar. Komento pa sa usa ka kritiko, “Nahisama na lang ang Cebu City og mansion sa datu, dako ug maanindot unta, apan walay trash can.”  Fezteleern!

Magpunay’g dulog

Gihingusgan karon sa kagamhanan sa dakbayan sa Sugbo, dinuyogan sa DPWH ang pagpanglimpyo sa mga canal ug drainage system isip kabahin sa halapad nga flood-mitigation program.  Karon ang saktong panahon nga manglimpyo sa mga kasapaan ug drainage system samtang wala pa moabot ang ting-ulan.   Angay pahimuslan ang kahigayonan kay matud pa bitaw sa usa ka lider sa laing nasud, “Ang problema sa mga mag-uuma sa Pilipinas kay panahon sa ting-ulan, inay magdaro ug mananom sa umahan, magpunay na man hinoon ug dulog sa asawa.”  Pagkatoytoy!