Kapitan miawhag sa Comelec nga ibutang nga “hotspot” iyang barangay
CEBU, Philippines – Pabor si incumbent Calamba Barangay Captain Yvonne Feliciano nga ibutang sa hotspot ang iyang barangay aron malikayan ang kagubot tungod sa nagsingabot nga Barangay ug Sangguniang Kabataan Election.
Kahinumduman nga si Konsehal Eldy Ygonia midangop kang Konsehal Dave Tumulak bahin sa giingong pagsulod diha sa ilang balay sa mga armadong lalaki niadtong Abril 17 kay nangita kaniya.
Si Ygonia mihangyo sa Commission on Elections nga pabantayan ang ilang barangay tungod sa maong insidente.
Si Feliciano miingon wala siya masayod sa reklamo ni Ygonia ug siya miklaro nga dili sa tanang higayon nga siya maoy dudahan.
Sumala pa niya mas maayong apil sa ikonsiderar nga ‘hotspot’ ang ilang barangay aron mahigpitan ang seguridad.
Giangkon ni Feliciano nga siya mismo daghan sab og nadawat nga harassment ug death threats ug gani nabalaka sab siya sa iyang seguridad.
“Nakig-coordinate nako sa mga polis nga ipa-closely monitored nila para masubay sad na nila kung kinsa na silang mga tawhana, kay wa ta kahibawo election baya ron basin gisakyan ba,” matud sa kapitan.
Si Atty. Anna Fleur Gujilde, Election Officer sa Cebu City South District miingon nga ila nang na-report sa ilang buhatan ug PNP labot niini aron himoan og evaluation ug assessment. (/IBM)(BANAT NEWS)
- Latest
