Kapin 20 ka trabahante gitabangan sa DOLE

CEBU, Philippines – Kapin sa 20 ka construction workers nga kasagaran gikan sa habagatang bahin sa Probinsiya sa Sugbo ug sa Negros Oriental ang nakadawat og kinatibuk-an nga P524,230 gikan sa Department of Labor and Employment (DOLE). Kini human sila niduso og Request for Assistance (RFA)   ubos sa programang Single Entry Approach (SenA) sa DOLE-7 niadtong Abril 11.

Sumala pa ni Elisa O. Mojana, ang Single Entry Desk Officer (SEADO), nga ang monetary award maoy nagsilbing bayad alang sa separation pay ug underpayment sa sweldo sa mga apektado nga mga trabahante.

Ang mga monetary benefits nga nadawat sa matag trabahador naggikan sa P4,000 ngadto sa P42,000.

Matud ni DOLE-7 Director, Atty. Alvin Villamor, nga ang programa gitanyag aron pagkab-ot og kasulbaran sa bangi sa mga trabahante ug sa kompaniya nga gitrabahoan nga minus ang gasto.

Ang kasagarang mga isyu nga gipaabot ubos sa SenA naglangkub sa pagtapos o pagsuspenso sa trabaho nga may kalambigitan sa kwarta sa bisan unsa nga kantidad ingon man usab ang non-coverage ug non-remittance sa mga benepisyo sa social welfare sama sa SSS, PhilHealth ug Pag-IBIG.

Gawas sa DOLE, pwede usab modangop ang mga kliyente nga gustong mopahimulos sa programa sa NCMB, NLRC-RAB, RTWPB, POEA, ug sa OWWA. (Niña Mae P. Salvacion/CNU Interns/GMR)(BANAT NEWS)