EDITORYAL - Wala gihapon maleksyon

Uwahi na ang pagyawit. Nahimo na sa China ang pagpangalan sa mga bukid ilawom sa dagat sa Philippine Rise o Benham Rise. Si Maritime law expert Jay Batongbacal mipahibalo nga giila ug giaprobahan sa International Hydrographic Organization (IHO) ang mga pangalan nga giduso sa China nga Jinghao Seamount, Tianbao Seamount, Haidonquing Seamount, Cuiqiao Hill ug Jujiu Seamount.

Samtang busy sa politika, internal nga isyu ug pagsalig ni Duterte sa China, ang ilang mga research vessels nagsige na og survey didto nga wa’y pananghid. Si Magdalo Representative Gary Alejano nagsaba-saba bahin niini, apan wala siya paminawa. Nabutaan ba ang atong mga lider sa mga donasyon, apil na ang soft loans para sa infrastructure projects, mga armas ug humanitarian assistance sa China?

Pila ka buwan na ang milabay, gianunsyo ni Foreign Affairs Secretary Alan Peter Cayetano nga ang China maka-research didto basta kauban ang Pilipino scientists. Apan sayo ning bulana, mimando si Duterte nga Pilipino lang maoy mag-research didto. Uwahi na kay duha ka adlaw sa wala pa ang deklarasyon, namiya na ang mga barko sa China. Tingali kompleto na ilang research, apan wa’y Pilipinong nakakuyog sa ilang misyon.

Ang 13-milyones ka ektaryang teritoryo nga sumpay sa continental shelf sa kabukiran sa Aurora province, gi-claim sa Pilipinas ubos sa administrasyong Aquino samtang init ang tensyon sa West Philippine Sea. Niadtong 2012, gideklarar sa United Nations nga kabahin kini sa teritoryo sa Pilipinas. Si Duterte mipausab sa pangalan nga Benham Rise ug gihimong Philippine Rise.

Ang tigpamaba ni Duterte nga si Harry Roque yano ra sa pag-ingon nga dili masuko ang China kon ilisan og pangalang Pilipino ang maong mga lugar. Mosugot kaha ang China? Ang dungog nga sila’y nihatag og pangalan ug mabutang sa mga opisyal nga mapa sa kalibutan, ila ra kaha nga buhian? Ang leksyon niini, maminaw pud unta bisan oposisyon pa maoy nagyawyaw, ilabi na kon teritoryo na sa nasud maoy gihisgotan.