Duha naangol sa nalusno nga riprap
Nalusno ... Maayong pagkaguba sa bungbong niining kongkretong balay human nalusno ang rip-rap ibabaw sa ilang balay diha sa Maghaway, Talisay City kagahapon sa buntag tungod sa paghumok sa yuta.— Gabriel Bonjoc
CEBU, Philippines — Duha ang naangol human nalusno ang riprap kilid sa panimay ug miguba sa bungbong niini diha sa Urban Poor Zone 3, Barangay Maghaway, Dakbayan sa Talisay kagahapon sa buntag. Gani ang usa sa mga nasamdan nga si Mar Vincent Abergido, 19, nakalayat gikan sa ilang pansayan sa dihang naghaguros ang mga bato ug yuta ug nihampak sa ilang bungbong. Apan wala siya makaipsot sa mga bildo nga gikan sa ilang bintana nga nangabuak nga iyang nayatakan.
Samtang usa ka Quennie Abergido, 20, ang mitug-an sa Banat News nga naipit sa nangatagak nga bato ang tiil sa ig-agaw nga si Kierly Ivy Sormillon, 16. Asoy pa ni Abergido nga nangatulog sila niadtong tungora sa dihang nidahili ang yuta ug mga bato. Si Konsehal Ricky Luza sa Maghaway nitug-an sa mga tigbalita nga ila na kining gi-report sa City Hall samtang ang barangay mogahin og pundo aron makatabang sa mga pamilyang naapektuhan. (BANAT NEWS)
- Latest
