E&F Surplus Hari sa 8th J&J Surplus Tilt

CEBU, Philippines - Naglumpayat sa kalipay ang E&F Surplus human midaog batok sa J&J Surplus sa ligas kayo nilang duwa sa finals, 105-103 aron pagsakmit sa korona sa 8th J&J Surplus Ballclub basketball tournament niadtong Sabado sa gabii didto sa GT Academy gym sa Tayud, Lilo-an.

Si Tingan Gestopa maoy misalida og maayo aron moiskor og 23 puntos, ingon man pangulohan ang nagpungasi nga opensa sa E&F Surplus nga milansang og 22-16 paghuman sa unang 10 minutos sa duwa.

Ang team owner nga si Fury ‘Triggerman’ Trazona miambit og 16 puntos sa iyang koponan.

Ang kainit sa ilang duwa nanakod sab ngadto  nilang Ken Nuñez ug Tata Betinol nga parehong mirehistro og double digits nga nakahatag og danyos sa J&J Surplus

Sila si Gestopa ug Trazona maoy labing daku nga katawa sa kadaogan kay si Tingan mao man ang gibayaw isip Finals MVP, samtang si Fury giila nga Conference MVP sulod sa ikatulong sunod-sunod nga higayon.

Sila sab ang nangulo sa Mythical Five uban nilang Larry Oroyan sa J&J Surplus, Uijji Takayuki sa Northern Energy ug Lorca sa D’ Jammers.

Labaw og singko puntos ang J&J Surplus, 75-70 sa sayong bahin sa fourth period ug makawat unta nila ang daog dihang ila ang ball possession human nagtabla ang iskor, 93-all sa nahibiling 28 segundos. Apan mikagar ang katapusan nilang bomba ug nakuha sa E&F Surplus ang  bola sa nahibiling singko segundos. Mipatawag dayon og time-out si Trazona aron makuhaan ang ilang presyur ug makahimo og maayong play.

Ang krusyal nga lusot ni Gestopa dayong kapupos sa oras maoy miselyo sa daog sa E&F Surplus.

Si Oroyan mikadlit og 30 puntos aron mangulo sa  J&J Surplus, gisundan ni Jomar Tiwan sa iyang 23 puntos.  Ang team manager ug ballclub president nga si Henry ‘Triggerman’ Agbon napugngan lang ngadto sa nuybe puntos.

Ang liga nahimong posible tungod sa pagtinabangay sa mga miyembro sa J&J Surplus Ballclub ubos sa liderato ni Henry Agbon.

Ang mga duwa gipadagan ni league commissioner Fury Trazona ug technical committee Chang Tejero sa abag nilang Jeper Inahid ug Choy Pilapil.

Sa laing bahin, gipahibalo ni Trazona nga ang 9th Conference sa J&J Surplus Ballclub gikatakdang sugdan karong Agosto 19 didto gihapon sa GT Academy gym.

Puntos matag usa

E&F Surplus (105) – Gestopa 23, Trazona 16,  Nuñez 14, Betinol 11, Layese 9, A. Sabang 8, Palo 7, Caballes 7, K. Sabang 4, Pepito 2, Caparroso 2, Ponce 2.

J&J Surplus (103) – Oroyan 30, Tiwan 23, Cabahug 11, H. Agbon 9, Adolfo 8, Mangubat 8, Astillero 7, Genteroloso 3, Hayahay 2, J. Agbon 2. (BANAT NEWS)