Alden at Maine hindi agad bumibitaw

Nagpapasalamat ang director ng GMA-7 primetime teleserye na Destined To Be Yours na si Irene Villamor dahil sa pagkakataon na makatrabaho niya ang Phenomenal Loveteam na sina Alden Richards at Maine Mendoza.

Hanga si Direk Irene sa pagbuo nila Alden at Maine ng kanilang characters na sina Benjie at Sinag. Hindi raw bumibitiw ang dalawa sa kanilang characters hanggang hindi natatapos ang bawat eksena nila.

Sobra raw ang tiwala na ibinigay ng dalawa sa kanya, lalo na sa mga mabibigat na eksena na kailangang umiyak sila nang todo-todo.

Kaya sa kanyang Instagram account ay ipinost ni Direk Irene ang kanyang kasiyahan na makatrabaho ang dalawa.

“Just finished a scene with these two... @aldenrichards02 @mainedcm sobrang sarap pala bilang direktor when you are discovering things about your actors, when you push them so hard and they let you... when they trust you with their hearts. it is my ultimate reward. thank you for today. *nood po kayo gabi-gabi! #destinedtobeyours”

Nakilala si Direk Irene dahil sa pagdirek niya ng drama-comedy film na Camp Sawi. Matagal din siyang naging assistant director ni Bb. Joyce Bernal hanggang sa mabigyan siya ng big break sa film at television.

Red Ranger ng Power Rangers kalaboso sa pananaksak!

Masesentensyahan ng anim na taon sa California State Prison ang isa sa original actors ng U.S. television series na Power Rangers na si Ricardo Medina.

Nag-plead guilty si Medina sa one count of manslaughter na naganap noong January 31, 2015.

Ayon sa imbestigasyon, sinaksak ni Medina ang kanyang roommate na si Josh Sutter ng ilang beses gamit ang isang espada sa apartment nila sa Palmdale, North of Los Angeles.

Ang pinag-ugatan daw ng alitan ng dalawa ay ang girlfriend ni Medina.

Si Medina pa raw ang tumawag sa 911 at hindi siya umalis sa apartment hanggang dumating ang mga pulis.

Inaresto si Medina pero pinakawalan pagkatapos ng ilang araw dahil sa ginawang imbestigasyon. Inaresto na lang ulit siya dahil sa nabuong imbestigasyon ng mga pulis.

Ginampanan ni Medina ang role bilang Red Lion Wild Force Ranger sa TV series na Power Rangers noong 1993.

Lumabas din siya sa mga series na CSI: Miami at ER.