Badian daghang tubig apan mainom nagnihit

CEBU, Philippines - Bisan daghang tinubdan sa tubig ang Lungsod sa Badian apan dili kini igo aron nga mahatagan og tubig ang mga residente gumikan sa kakuwang sa mga waterworks system nga makadala og tubig ngadto sa mga panimalay.

Kini ang gibutyag sa mga barangay kapitan sa Badian atol sa consultative meeting nga gipahigayon sa lungsod niadtong Lunes nga gitambungan ni Gobernador Hilario Davide III.

Si Russel Babiera, kapitan sa Barangay Dagatan, nagkanayon nga ang tubig gikan sa Barangay Sohoton adto lang kini padulong sa upper sitios sa ilang barangay ug dili na moabot sa lower sitios.

“Niaging tuig ni nagsugod panahon sa hulaw. Lisod kay kana among multicab dili man unta na gamiton sa pagkabo og tubig amo na lang gamiton kay wala nay tubig maabot sa among barangay,” matud ni Babiera. Mokuha og tubig ang mga residente sa munisipyo.

Sa Barangay Zaragosa nga usa ka isla nga adunay 366 ka panimalay ang nihit sab sa tubig.

Matud ni Chona Magalso, usa ka residente, nga magkuha sila og tubig sa mainland diin ilang palit niini piso matag container sakay sa baroto.

Dugang niya nga naay tubo gikan sa mainland nga nag-supply kanila og tubig apan dili gihapon kini igo.

Atol sa consultative meeting, kasagarang hangyo sa mga kapitan mao nga mahatagan sila o ma-develop ang waterworks system sa ilang barangay aron mahatagan og igong tubig ang mga residente.

Si Davide nisaad sab nga tubagon ang problema sa tubig sa lungsod ug nimando sa mga kapitan nga magpadala lang og pormal nga hangyo sa Kapitolyo. (BANAT NEWS)