Pagbarato sa lana

Samtang mosaka ang presyo sa lana sa Pilipinas karong adlawa, nitidlom ang presyo sa nagkalainlaing produkto sa lana sa merkado sa kalibutan.

Nanukad ang pagbarato sa lana sa nisibaw nga pagtuo nga magpadayon ang pagbaha sa subrang suplay hangtod sa sunod tuig. Gisalikway sa mga eksperto ang panghinaot sa mga kompaniya sa lana nga ang pagtibugsok sa suplay sa lana sa Estados Unidos sa niaging semana mao nay sinugdanan sa pagkasulbad sa subrang suplay.

Manghinaot ta nga magpadayon ang pag-us-os sa presyo sa lana sa mosunod nga mga adlaw aron nga makatilaw na sab ang mga Pilipinhon og dako nga laslas sa presyo sa lana human sa sunudsunod nga pagsaka sa niaging mga semana.

* * *

Tulo ang hinungdan sa dakong sulbong sa presyo sa lana sa niaging semana:

Una, ang pahibawo sa Energy Information Administration nga ang suplay sa krudo sa Estados Unidos nitidlom og 14.5 milyones ka baril, nga maoy labing dako sa niaging 17 ka tuig;

Ikaduha, ang pagpirma sa Saudi Arabia ug Russia og kauyonan sa paglaslas sa ilang produksiyon; ug

Ikatulo, ang paglig-on sa Amerikanhong dolyar, nga maoy gibasehan sa presyo sa lana, batok sa kuwarta sa ubang kanasuran, apil sa Pilipinas.

* * *

Kumbinsido ang mga eksperto nga ang dakong tidlom sa suplay sa lana sa Estados Unidos dili molahutay sa mosunod nga mga semana kay nasubay nga nanukad ra diay kini sa dautang kahimtang sa panahon. Nga nakabalda sa produksiyon ug nakalangay sa mga barko nga gikargahan og lana gikan sa Gulf Coast sa Estados Unidos ug Mexico.

Gani, napanid-an nga nibalik na ang operasyon sa Gulf of Mexico ug naglinya na ang oil tankers sa ilang turno sa pagdiskarga sa mga kargamento.

Gikabalak-an sa mga negosyante nga mobalik na sab pagsulbong ang imbentaryo sa lana sunod semana.

* * *

Naibanan sab ang gibug-aton sa kauyonan sa Saudi ug Russia paglaslas sa ilang produksiyon tungod sa kapakyas pag-detalye kun pila ang maiban ug kun kanus-a ipatuman. Wa pa’y klaro makab-ot ba ang mas lapad nga kauyonan paglaslas sa produksiyon atol sa tigum sa mga sakop sa Organization of Petroleum Exporting Countries (OPEC) sa Algeria karong buwana.

Gitumbok nang daan ang higanteng mga babag sa kauyonan: Kasagaran sa mga sakop sa OPEC nipaburot sa ilang produksiyon; ug ang Iran padayong niinsistir pagkuha pagbalik sa mas dakong bahin sa kalibutanong merkado sa wa pa pahamtangi og oil embargo sa United Nations niadtong 2012.

Laing sukaranan sa pangagpas nga mobarato ang lana mao ang pagkausab sa hunahuna sa mga negosyante nga nihunong pagbubo og puhonan tungod sa kaubos sa presyo.  Nakadawat na sa kahigayonan nga dili na mobalik ang kamahal sa lana, ang mga negosyante nibalik na sab sa pagpalambo sa bag-ong mga tinubdan sa lana. 

([email protected])