Reporter subling nakadawat og hulga

CEBU, Philippines - Laing hulga na usab ang nadawat sa magsisibya nga mireklamo batok sa usa ka Tourist Cop diha sa Dakbayan sa Lapu-Lapu nga nagbahad sa iyang kinabuhi.

Matud pa ang laing hulga nadawat ni Norman Mendoza, 44, sa miaging Sabado sa gabii samtang diha kini sa ilahang panimalay sa dakbayan sa Mandaue. Nagkanayon si Mendoza, reporter sa RGMA- DySS ug Cebu Daily News nga wa mailhing numero sa cellphone ang kalit mi-text kaniya pasado alas 10 sa gabii ug mihulga sa iyang kinabuhi nga kutob nalang kini sa All Souls’ Day o ika Nobiyembre 2.

 “Yabag mo igso b4 ko itransfer sa ibang lugar tumbahon ka namin ng boss ko kc korap ka na leader ka mga media lapu. Lapu-Lapu until all souls day ka na lang panid an ka namo gasunod rami imu luyo para tumba ka na condolence,” ang mga pulong nga gisaysay sa text message gikan sa wala mailhing numero.

Laing mensahe gikan gihapon sa parehong numero nag-ingon: “Igsu nandto lng kami sa likod mo nagsubaybay sa mga lakad mo nag antay ng timing para tumba ka na para sa amo namin d2 lapu corrupt ka na leader sa mga media ng lapu tinirahan mo amo namin sa radyo pwes cegi lintik lang walang ganti yabang mo cge ubusan ng lahi.”

Apan mabantayan sa unod sa text nga daw managlahi ang tawong nag-text niini.Dunay gidudahan nga tawo si Mendoza nga maoy nagpaluyo sa  mga nadawat nga death threats niini.

“Naa man dinhi sa text nga ‘before ko i-transfer, tumbahon ka namo’. Nahibaw-an na kung kinsa ni siya,” si Mendoza miingon nga si SPO2 Esnang Sarapuddin sa Lapu-Lapu City Tourist Police ang iyang gidudahan.

Kahinumduman nga unang ni-file og blotter report si Mendoza sa miaging semana didto sa Gun-ob Police Station 3 sa Dakbayan sa Lapu-Lapu , human sa gikatahong pagpanghulga ni Sarapuddin, nga nahitabo sa Sitio Seaside, Barangay Pajo, ubos sa Mandaue-Mactan Bridge.

Subay niini, mo-file og laing blotter report si Mendoza ngadto sa Mandaue City Police Station 1. Giabisohan sab si Mendoza nga moadto sa Police Regional Office-7 aron mopasaka og reklamo batok ni Sarapuddin. Si Sarapuddin daan ng mihimakak nga iyang gihulga nga patyon si Mendoza, apan wala pa siya makuhai og pamahayag bahin niining bag-ong pasangil batok kaniya.

Sa miaging report, si Police Chief Superintendent Noli Taliño sa PRO-7 nga mitahas ngadto ni Police Senior Superintendent Rommel Cabagnot , hepe sa Lapu-Lapu City Police Office nga palawman ang pagsusi sa nahitabong insidente. 

Matud ni Taliño posibleng mabalhin sa Cordillera si Sarapuddin kung mapamatud-an ang gi-alegar sa maong reporter. (BANAT NEWS)