Lapu-lapu Traffic chief luwas na human pusila

CEBU, Philippines - Luwas na sa kuyaw nga kahimtang ang traffic chief sa dakbayan sa Lapu-Lapu nga si Frank Brazil human pusila sa wala mailhing tawo samtang nag-andam kini sa triathlon event pasado alas 7 sa gabii niadtong Sabado sa may City Traffic Management Systems office sa Barangay Poblacion.

Gibutyag kini ni Mayor Paz Radaza sa Banat News ug miingon nga si Brazil mismo ang nakighinabi sa doktor human kini tambali sa UCMed sa dakbayan sa Mandaue.

Sa inisyal nga imbestigasyon ni PO3 Luisito Ernie sa Lapu-Lapu City Police Office-Homicide Section nga pasado alas 7 sa gabii niadtong Sabado,  nag-supervise si Brazil sa pagkuha og barikada sa Poblacion Barangay Hall sa mga sakup sa CTMS.

Dihang nisaka si Brazil padung sa ilang buhatan nga atbang ra sa barangay hall, kalit nga nitunga ang wa mailhing mamumuno ug gidul-it sa pagpusil sa buko-buko si Brazil.

Nakaangkon og duha ka samad pinusilan si Brazil ug dali kining nakapangayo og tabang sa mga CTMS personnel.

Una siyang gidala sa Mactan Doctors Hospital apan gibalhin sa UCMed.

Matud ni Ernie, wala nakabantay og buto ang mga CTMS personnel tungod kay ang gunman nagbutang og silencer sa iyang armas.

Gikatahong nagsul-ob og ball cap, black jacket ug shorts ang maong mamumuno kinsa miikyas pinaagi sa pagdagan padung sa duol nga merkado.

Nakuha sa crime scene ang duha ka kabhang gikan sa .45 caliber pistol.

Duha ka motibo ang gitan-aw sa kapolisan sa maong insidente: una ang kampanya sa CTMS kontra sa kolorum nga mga sakyanan diin si Brazil sagad manakop niini dapit sa Cebu Light Industrial Park sa Barangay Basak. Ikaduha, adunay gitaktak si Brazil nga traffic personnel ug posibleng nanimawos kini.

Apan nagkanayon si Radaza nga "work-related" ang motibo sa insidente ug dili ang bahin sa pagtaktak sa mga CTMS personnel kay siya mismo ang nagpatangtang niini.

Human nag-stable ang kondisyon ni Brazil, mitataw si Radaza nga nangayo siya og tabang ngadto kang PRO7 Regional Director Noel Taliño ug kang PSSupt. Rey Lyndon Lawas.

Wala pa niya mahibaw-i kun unsang adlawa ma-discharge sa ospital si Brazil kay gipaubos pa kini og obserbasyon sa doktor ug ilabi na ang paghatag og x-ray.

Gimanduan sab ni Radaza ang LCPO nga mohimo og imbestigasyon kun kinsa ang nagpaluyo sa maong pagpamusil. (BANAT NEWS)