‘Laglag-bala’ sa tugpahanan

Susama didto sa Ninoy Aquino International Airport sa kaulohan, adunay nakuha usab nga mga bala ang otoridad diha sa Mactan Cebu International Airport gikan sa mga  pasahero. Hagbay ra kuno kini nga nahitabo dinhi. 

Apan dili susama didto sa NAIA, walay kisaw ang maong isyu dinhi sa atong airport sa Mactan. Gani, human ang usa ka pasahero makuhaan og bala, makahimo na kini nga molarga ngadto sa iyang destinasyon. 

Ug dili susama didto sa kaulohan, tataw nga walay sindikato nga nagpaluyo niining mga bala nga nakuha diha sa MCIA. Kini tungod kay mga anting-anting kuno kasagaran sa mga bala nga nakuha gikan sa mga pasahero diha sa atong tugpahanan.

Maayo na lamang nga wala masakyi ang MCIA niining mga sindikato nga nagpaluyo sa “laglag-bala” didto sa NAIA. Kay kun ania pa ang presensiya sa maong sindikato, dako kini nga epekto sa lokal nga industriya sa turismo.

Ang “laglag-bala” didto sa NAIA naghatag na usab og dakong lama sa imahe sa nag-una nga tugpahanan sa nasud. Ug hangtud karon, pabiling nagnganga ang otoridad ngano nga midako ug nakapaalarma na kining maong anomaliya.

Sa akong tan-aw, dakong sindikato ang nagpaluyo niining maong scam nga gusto mohukhok sa mga pasahero, ilabina niadtong mga overseas Filipino workers. Mao nang nakat-on na pagputos ang mga sumasakay didto sa NAIA sa ilang mga bagahi aron nga dili kini masudlan og bala.

Ug posible nga kining maong sindikato adunay kakunsabo nga mga opisyal diha sa NAIA. Apan kun kinsa kining mao nga sindikato ug mga opisyal nga nalambigit, tak-om ang mga baba sa otoridad sa tugpahanan ug kapolisan pagkonpirma niini.     

Angay lamang nga moaksiyon dayon ang kagamhanan pagrelibo niadtong mga bugok nga opisyal diha sa maong tugpahanan. Tungod sa nagpadayon nga scam, klarong adunay blessing ang sindikato gikan sa pipila ka dakong personalidad sa airport. 

Hagbay ra ang NAIA nga gibatikos isip usa sa “worst airports” sa kalibotan. Ug samot nga moyam-id na usab ang internasyonal nga komunidad niining bag-ong kontrobersiya, ilabina nga daghan na sa mga foreign tourists ang misaylo na sa Pilipinas.