Nietes gideklara nga ‘Super Champion’ sa WBO
CEBU, Philippines – Nadugangan pa ang dungog ni Donnie ‘Ahas’ Nietes, ang giyukboan nga longest reigning Filipino world boxing champion, human siya pormal nga gideklara sa WBO isip ‘Super Champion’ atol sa pagbukas sa ika-28 nga convention sa maong organisasyon niadtong Martes sa gabii (kagahapon oras dinhi sa Pilipinas) didto sa Hilton Orlando Buena Vista Park sa Orlando, Florida.
Segun sa taho ni Dong Secuya sa philboxing.com, ang 33-anyos nga si Nietes mainiton nga gidawat ni WBO President Francisco ‘Paco’ Varcalcel ug uban pa nga mga opisyales sa maong kahugpongan atol sa pormal nga pag-anunsiyo sa iyang estado isip usa ka ‘super champion’.
Ang talagsaon nga pasidungog itunol lamang sa WBO ngadto sa usa ka boksidor kansang nakab-ot lisud hitupngan samtang kini naghari isip usa ka kampiyon.
Gumikan niini, ang garbo sa ALA Boxing Gym nga lumad gikan sa Murcia, Negros Occidental nakig-uban na karon sa laray sa lain pang mga banggiitan nga WBO super champions nga naglakip ni Pinoy ring superstar Manny Pacquiao, Wladimir Klitschko sa Ukraine, Marco Huck sa Germany ug Sergey Kovalev sa Russia.
Si Nietes, kinsa nagtangag og 37-1-4 win-loss-draw record uban ang 21KOs, wa’y pilde-pilde sud na sa 11 ka tuig. Nahimo siyang WBO minimumweight champion human gipilde si Thai Poonsawan Porpramuk niadtong 2007 dinhi sa Waterfront Cebu City Hotel and Casino.
Upat ka higayon nga nadepensahan niya ang iyang trono sa wala pa mikatkat sa light flyweight division diin siya nahimo na usab nga world champion human gikulata ang Mehikanong si Ramon Garcia Hirales niadtong Oktubre 8, 2011.
Walo na ka higayon nga nadepensahan ni Nietes ang iyang titulo, ang labing uwahi batok ni Juan ‘Pinky’ Alejo sa Mexico atol sa makasaysayanong Pinoy Pride event didto sa Amerika duha pa ka semana ang milabay didto sa StubHub Center sa Carson, California. (BANAT NEWS)
- Latest
