EDITORYAL - Customs giabong sa binuang sa DAP

Gihimong “smokescreen” ni Pres. Noynoy Aquino ug sa iyang administrasyon ang Bureau of Customs aron matabonan ang ilang mga binuang sa pundo gikan sa savings sa nagkalainlaing ahensiya sa kagamhanan.

Walay puas ang maniobra sa savings gikan sa mga ahensiya agi sa Disbursement Acceleration Program, dungan niini ang paglapdos ni Noynoy sa Customs. Gitukod ni Noynoy ang Office of Revenue Agency Modernization (ORAM) ubos sa Executive Order 139 pag-legalisar sa pagbutang og mga retiradong opisyal sa Armadong Kusog ngadto sa Customs. Dungan niini ang paghimo sa Customs Policy and Research Office (CPRO) aron himuong labayanan sa mga customs collector nga gipapulihan sa mga retiradong sundalo. Apan mitumaw karong bag-o nga ang suweldo sa mga retiradong kasundalohan nga gibutang sa Customs gikan diay sa DAP kay nakabutang sa Section 6 sa EO 139 paggama sa ORAM nga ang ilang suweldo pagakuhaon sa “savings” sa Department of Finance ug sa Customs. Bisan sa kahimoan niining ORAM, miti-urok gihapon ang revenue collection sa Customs og 12.8 porsiyento gikan sa kolektahonong duties and taxes. Sa ato pa, wala mawagtang ang korapsiyon bisan gibutang ni Noynoy ang mga retiradong sundalo ngadto sa Customs. Misamot hinuon. Mapaabot hinuon nga birahan pag-ayo ni Noynoy ang Korte Suprema nga mideklarar nga unconstitutional sa mga aksiyon subay sa DAP. Birahan pa kaha ni Noynoy ang Customs sa iyang SONA?

Dili na kita makasalig pa sa pamunoan ni Noynoy niining nahibiling duha pa ka tuig sa dili pa siya mailisan sa 2016. Kitang mga Pilipino na ang angay magmonitor sa mga buhat sa atong mga opisyal, kay sumala pa ni Atty. Levito Baligod, ang abogado sa mga pork barrel whistleblowers ug private complainant sa petisyon kontra Priority Development Assistance Fund kon PDAF, nga ang mabinantayon nga katawhan maoy makapugong sa korapsiyon sa gobiyerno. Dinhi si Baligod sa Sugbo niadtong Hulyo 18 isip speaker sa Active Citizenship in Integrity in Public Service forum sa University of San Carlos – Talamban campus. Gisultian ni Baligod ang mga partisipante sa forum nga tinun-an, academe, media ug mga nagkadaiyang grupo nga ang aktibo nga katawhan epektibo nga hinigiban kontra korapsiyon. Tungod sa paninguha ni Baligod ug ni Benhur Luy nga mayagyag ang pork barrel scam, daghan ang nakasohan usa na niini ang mastermind nga si Janet Lim-Napoles.

Uban ni Baligod sa forum si Court of Appeals – Cebu Executive Justice Gabriel Ingles kinsa sama ni Baligod, nagtuo nga ang mga tawong magmabinantayon sa kalihukan sa gobiyerno maoy makapakgang sa mga binuang.