Usa ka polis sa MCPO adik
CEBU, Philippines - Usa ka sakop sa Mandaue City Police Office (MCPO) ang nagpositibo gikan sa 49 ka mga polis nga gipaubos sa surprise drug test kagahapon sa buntag.
Hinuon subject pa kini alang sa confirmatory test apan ang maong pulis daling girelibuhan sa katungdanan, gikuhaan sa iyang tsapa ug service firearm ug anaa kini karon gidestino sa police headquarters samtang himoon ang imbestigasyon.
Dili lang kay mga Philippine Non-Commissioned Officer (PNCO) ang gipaubos sa suprise drug test apan lakip na usab ang mga Police Commissioned Officer (PCO) lakip ang ilang director nga si Senior Superintendent Petronelli Baldebrin.
Matud ni Baldebrin nga ang pagpahigayon og surprise drug test kamanduan sa ilang labaw aron malimpyo ang han-ay sa kapulisan sa mga pulis nga tiggamitan og ginadiling drugas.
Giangkon usab ni Baldebrin nga aduna silay mga report nga nadawat labot sa mga pasangil nga aduna kini mga sakop nga nalambigit sa ilegal nga drugas hinungdan sa paghimo og surprise drug test.
Matud niya mahinungdanon g’yud ang drug test tungod kay kadtong mga police nga mogamit og illegal drugs apektado gyud ang trabaho niini isip police.
Samtang si SPO1 Silveriano Aparicio nadestino sa Canduman Police Station ug usa sa mga mipaubos sa surprise drug test miingon nga kompiyansa kini nga negatibo siya sa ilegal nga drugas apan gisuportahan niya ang maong drug test kay importante kini alang kanila.
Kun kapamatud-an sa confirmatory test nga tiggamitan gyud og illegal drugs ang maong polis dako kaayo ang kahigayonan nga mataktak kini sa serbisyo. (BANAT NEWS)
- Latest
