Lancers miwani sa Webmasters

CEBU, Philippines — Ang four-time defending champions University of the Visayas (UV) Green Lancers nagsandig sa eksplosibo nilang opensiba sa second half aron tumbahon ang University of Cebu (UC) Webmasters, 80-65, sa Cebu Schools Athletic Foundation, Inc. (CESAFI) Season 26 basketball tournament niadtong Domingo sa gabii, Septiyembre 27, sa Cebu Coliseum.

Si reigning Most Valuable Player Kent Ivo Salarda mipabuto og 21 puntos uban ang unom ka rebounds, tulo ka assists, usa ka steal ug usa ka block, samtang si 2024 MVP Raul Gentallan midugang

og 18 puntos, unom ka rebounds, unom ka assists, upat ka steals ug usa ka block sa dihang ang Lancers miduyog sa University of San Carlos (USC) Warriors ug Benedicto College (BC) Cheetahs sa kinatas-ang dapit sa college division standings bitbit ang parehong 4-1 nga baraha.

Mihimo sab og kasikas si Albert John Sacayan uban ang 14 puntos, duha ka rebounds ug duha ka steals alang sa Lancers, nga nanginit human sa 38-38 nga panagtabla sa halftime ug milabaw og 11 puntos,  63-52, human sa tulo ka kuwarter sa wala pa milahos ngadto sa 15 puntos nga kadaogan.

Si Ray Charles Libatog maoy nangu sa UC uban ang 19 puntos ug pito ka rebounds. Si Luther Leonard mihipos og 16 puntos, unom ka rebounds ug tulo ka assists, samtang si Joie Perino mitali og 10 puntos ug upat ka rebounds apan naminghoy silang tanan kay ang Webmasters natagak sa  4-2.

Sa laing collegiate matchup, ang University of San Jose-Recoletos (USJ-R) Jaguars mitabla sa ilang rekord ngadto sa 3-3 human gibuntog ang University of Southern Philippines Foundation (USPF) Panthers sa overtime, 62-59.

Si John Onin Nonay mipupo og 12 puntos ug tulo ka rebounds alang sa Jaguars. Si Alcher Obra mitampo og 10 puntos ug walo ka rebounds, samtang si Kenneth Calvin Cole mikulit sab og 10 puntos uban ang duha ka rebounds, tulo ka assists ug duha ka steals.

Si Peter John Peteros mikolekta og 18 puntos, duha ka rebounds, lima ka assists ug tulo ka steals, samtang si LyBron James Lamo mitimbre og 13 puntos, upat ka rebounds ug upat ka assists alang sa Panthers, nga nahagsa sa 1-5.

Sa juniors division, si Marky Mitch Goc-ong mibirada og 23 puntos, pito ka rebounds, upat ka assists ug tulo ka three steals sa dihang giinat sa University of Cebu Lapu-Lapu and Mandaue (UCLM) ang perpekto nilang sinugdanan ngadto sa 4-0 uban ang 60-43 nga pagpalampaso sa Cebu Eastern College (CEC) Dragons.

Si Jade Bialan miposte og double-double nga 24 puntos ug 11 ka rebounds uban ang upat ka four blocks alang sa UC Junior  Webmasters, nga midemolis sa PAREF Springdale Titans, 102-44, alang sa ikaupat nilang daog sa lima ka duwa.