Pilipinas naka-bronze sa World Chess Olympiad

CEBU, Philippines — Ang Philippine men’s team milangkat og bronze medal sa Category B sa 46th World Chess Olympiad niadtong Domingo sa gabii, Septiyembre 27, didto sa Silk Road International Exhibition Centre sa Samarkand, Uzbekistan.

Kini human gipildi sa mga Pinoy ang Panama, 3-1, sa ika-11 ug katapusang hugna.

Mao kini ang ikaduhang sagunson nga medalya alang sa Pilipinas human ang nasud misakmit og gold medal sa Category B sa women’s section sa miaging edisyon sa prestihiyosong kompetisyon didto sa Budapest, Hungary duha ka tuig na ang milabay.

Si International Master Pau Bersamina ug Grandmaster Darwin Laylo mikulit og daog sa boards 2 ug 4 samtang sila si IMs Michael Concio, Jr. ug Jem Garcia nakatabla sa boards 1 ug 3 nga nakatabang pagsilyo sa krusyal nilang daog.

Sa kinatibuk-an, ang mga Pinoy mitapos sa ika-32 nga dapit uban ang 14.0 puntos. Dako kaayo ang gihimo nilang paglayat gikan sa ika-59 nga puwesto sa miaging higayon.

Ang Vietnam maoy miangkon sa Category B gold samtang ang Mongolia milabni sa silver.

Ang host Uzbekistan maoy nanghawod sa torneyo uban ang 20.0 puntos. Ang 2024 champion nga  India mitapos nga ikaduha ning higayona samtang ang Germany nalandig sa ikatulong dapit.