VP Sara pinahaharap sa Impeachment Court sa Lunes

MANILA, Philippines — Inutusan ng Senate impeachment court si Vice President Sara Duterte na humarap “nang personal o sa pamamagitan ng abogado” sa kanyang paglilitis sa Lunes, Hulyo 6.

Ang notice ay nilagdaan ni Senate President at Impeachment Court presiding officer Sherwin Gatchalian na may petsang Hulyo 2, 2026 kung saan pormal na ipinaaalam kay Duterte na magsisimula na ang kanyang paglilitis.

“You are hereby notified that trial will commence on the 6th of July at 2 o’clock in the afternoon, and are further directed to appear on said date, in person or through counsel, before the Impeachment Court at the Session Hall of the Senate of the Philippines, Pasay City,” nakasaad sa notice.

Nakasaad din na ang atas ay naaayon sa “Rule VII of the Rules of Procedure on Impeachment Trials and in accordance with the Writ of Summons issued on 19 May 2026” kung saan inaatasan si Duterte na humarap sa “Senate of the Philippines upon notice, and to abide by, obey and perform such orders, directions and judgments as the Senate of the Philippines shall make in the premises according to the Constitution and laws of the Philippines.”

Ang notice ay inilagay sa website ng Senado na nagpapakita na ang abiso ay natanggap ng law firm na Fortun, Narvasa & Salazar.

Naglabas din ang Senate impeachment court ng abiso noong Huwebes sa House of Representatives na nagsasabing handa na ang Senado na ituloy ang paglilitis sa impeachment ni VP Sara sa Session Hall ng Senado ng Pilipinas sa Hulyo 6 sa ganap na alas-2 ng hapon.

Ang abiso ay nilagdaan ng Senate Secretary at impeachment clerk of court na si Atty. Renato Bantug Jr., at natanggap ng House of Representatives Impeachment Secretariat.