8 evacuation centers binuksan sa Parañaque
MANILA, Philippines — Pinabuksan ni Parañaque City Mayor Edwin Olivarez nitong Sabado ang walong evacuation center sa limang barangay para sa mga inilikas na residenteng apektado ng malakas na bugso ng ulan at pagbaha na dala ng habagat.
Sa ulat, nakapagtala ng 95 pamilya na pansamantalang nanunuluyan sa apat na evacuation sites sa Barangay San Antonio at Brgy. San Isidro.
Kabilang sa ginawang shelter ng mga evacuees ang Silverio Elementary School na may 5 pamilya, 70 pamilya sa Santos Multipurpose Hall, at 9 na pamilya sa Lopez Village Multipurpose Hall, pawang sa Brgy. San Isidro; habang sa mismong brgy. hall ng San Antonio ay may 11 pamilya.
Nanawagan din ang alkalde sa mga residente na unahin ang kanilang kaligtasan at makipag-ugnayan sa mga opisyal ng kanilang barangay kung kakailanganing lumikas mula sa kanilang tahanan. Mayroon pa aniyang, nakatambay na evacuation centers sakaling mas tumindi pa ang pag-ulan na magdudulot ng pagbaha.
Kung may agarang emergencies, maaring tumawag sa Parañaque hotlines sa landline 8820 PQUE (7783), emergency number 911, o sa 0920 983 3252.
- Latest
