2 sundalo tepok sa kidlat, 4 pa sugatan
MANILA, Philippines — Dalawang sundalo ang patay habang apat pang kasamahan ang sugatan makaraang masapol ng kidlat habang ginagampanan ang kanilang tungkulin sa hangganan ng Western Uma, Brgys. Lubuagan at Balatoc sa bayan ng Pasil, Kalinga kamakalawa.
Sa report ni Army’s 5th Infantry Division (ID) Commander Major Gen. Audrey Pasia, kinilala ang mga nasawi na sina Corporal Andrew Five Monterubio ng Gamu, Isabela at PFc Inmongog Aronchay ng Sadanga, Mt. Province.
Patuloy namang nilalapatan ng lunas sa pagamutan ang mga sugatang sina Sgt. Dennis Bananao ng Tanudan, Kalinga; Pfc Melvin Danggalan ng Paracelis, Mountain Province; Pfc Abegil Awingan ng Pinukpuk, Kalinga t Pfc Riel Angya ng Pasil, Kalinga.
Bandang alas-4:30 ng hapon, ayon kay Pasia habang makulimlim ang kalangitan, dumadagundong ang nakakabinging kulog at biglang kumidlat sa nasabing lugar at nagkataon namang nagsasagawa ng opensiba ang tropa ng 54th Infantry Battalion ng Philippine laban sa nalalabi pang mga rebeldeng New People’s Army (NPA) na namumugad sa lalawigan.
Posible umanong gumamit ng cellphone o radio ang naturang mga sundalo kaya hinagupit ang tropa ng matalim na kidlat.
Nagpaabot na si Pasia ng pakikiramay sa pamilya ng mga nasawing sundalo at tiniyak ang benepisyo para sa kanilang naulilang mga mahal sa buhay.
- Latest
