Gloria mitambong sa selebrasyon sa 7th Women's Congress sa Capitol

Pormal nang nadawat ni Presidente Gloria Macapagal Arroyo ang tulo ka mga resolution nga giduso sa Cebu Province 7th Women's Congress kagahapong adlawa diha sa Social Hall sa Cebu Provincial Capitol. Ang pagdunol sa maong resolution gipanguluhan mismo ni Gobernador Gwendolyn Garcia, kinsa mao usay tsirman sa Provincial Women's Commission uban nila ni Bise Gobernador Gregorio Sanchez, mga sakop sa provincial board ug ubang mga opisyal sa women's group gikan sa kalungsuran ug mga component cities.

Atol sa pagpamulong sa gobernador gipadayag niini nga ang kusog sa mga kababayen-an dili lang kini usa ka women's power, kundili usa ka kusog ngadto na sa kausaban, gumikan kay "women who carry the seeds of change it is we who live out the cycle of life it is us who bring forth life and nature." Gidugang pa niini nga usa sa makahatag og insaktong kausaban sa tinguha sa kababayen-an mao ang positibong epekto niini ngadto sa katawhan.

Ang maong resolusyon mao ang pag-awhag sa mga mayor sa dakbayan ug munisipyo nga dugangan ang mga benipisyo niadtong mga kababayen-ang tigulang, kabus, ubos kaayo ang income ug kadtong mga adunay deperensya sa panglawas ug ang ikaduha mao ang pag-awhag sa tanang liders sa kababayen-an sa probinsya sa Sugbu nga pag mobilize sa ilang tinguha nga makahupot og igong representasyon sa local legislative body sa ingon ilang ma-istablisar ang tiunay nga women empowerments sa paghupot og mga katungdanan sa panggobiyerno. Samtang ang ikatulo nga resolusyon mao ang subling pag-awhag sa mga kababayen-an sa probinsya sa Sugbu pagsupak sa laraw nga pagbuak-buak sa Sugbu ngadto na sa tulo ka mga probinsya ug pagsagop sa provincial women's commission nga maoy magdala sa tingog sa kababayen-an sa probinsya sa Sugbu.