Mohukom nga nagpiyong

Mipetisyon si former Speaker Martin Romualdez sa Sandiganbayan nga tugotan siya nga makapiyansa alang sa iyang temporaryong kagawasan sa giatubang niya nga kasong plunder. Mi-insister ang iyang abogado nga dili flight risk si Romuldez.  Sagad adunay katungod ang akusado nga makapiyansa, apan aduna’y mga kaso nga gilatid na daan sa balaod nga non-bailable sama sa plunder. Kon tugotan nga makapiyansa si Romuladez, mahaum kini sa kanta ni Max Surban nga, “Ang lady justice, sama gyud diay sa albularyong buta, mohukom (motambal) nga nagpiyong ang mata.”  Ateerr!

Miangkon si Manila Representative Bienvenido Abante, Jr., nga nahikatulog siya atol sa impeachment trial ni Bise Presidente Sara Duterte tungod kay gi-laay kuno sa mga pangutana sa depensa atol sa cross examination. Nakatilaw og mga pagbugalbugal si Abante sa mga netizen tungod sa maong hitabo.  Sa rason ni Abante, mora’g iyang gipagawas nga maayong laki siya kon itandi sa mga abogado sa depensa hinungdan nga gibati siya’g kalaay.  Apan sa nahitabo, haum usab kaniya ang pagya nga nagkanayon, “Kon magkapuliki na sa korte, tagpilaw dayon aron ingnon inosente.”  Muleeng!

Gipanghimakak sa Philippine National Police (PNP) ang pangangkon ni Patrolman Rodulfo Gracioso Jr., nga wala siya masayod nga na-dismiss na diay siya sa pagka-polis.  Matud pa sa PNP, si Gracioso mismo ang mi-apelar sa maong dismissal order.  Mahinumduman nga nangangkon kini si Gracioso nga siya mismo ang nagdeliver og P2 bilyones ngadto sa bise presidente ug sa ubang sakop sa banay’ng Duterte.  Mao kana’y giingon nga “Ang mga matang sa bakakon nga sama kang Gracioso maoy hinungdan nga kinahanglan butangan og instruction ang pakete sa shampoo.”  Madahaan!

Gisikop sa kapolisan didto sa Pioduran, Albay ang duha ka mga tawo ug gisakmit usab ang dala nilang binulad nga puffer fish, kon isda’ng tikong, nga moabot og 350 kilos.  Kalapasan sa Secton 125, R.A. 10654 kon Philippine Fisheries Code ingong man sa Fisheries Administrative Order No. 249 ang ilang gibuhat.  Aron masulbad kining paglapas sa Fisheries Laws, maayo tingale nga mosubay ang mga pulis sa panultihon nga “Kon hatagan ang mananagat og isda, makakaon siya sa usa ka adlaw; apan kon hatagan siya’g makahilo nga tikong o butete, dili na gyud  siya mokaon pag-usab.”  Pagkatoytoy!

Nangangkon ang PISTON-Cebu nga ang transport strike nga gipahigayon niadtong Septyembre 29 nakabalda sa 80% sa public transport sa pipila ka rota sa Metro Cebu.  Apan alang kang Cebu City Councilor Dave Tumulak, walay impact ang protesta sa mga sumasakay tungod kay daghan man gihapon nga mga publikong sakyanan ang nag-operate.  Sa paglabay sa panahon, kining mga transport strike daw nawad-an na sa iyang relevance tungod kay, gawas nga makahasul sa katawhan, makaduda na usab ang tinuod nga katuyoan.  Matud pa sa usa ka commuter, “Ang transport strike nahisama na lang sa kanta nga “My Way” diin sum-ol ug makasapot na’ng paminawon.”  Fezteleern!