Pribadong sakyanan ug biseklita gidaro sa SUV

CEBU, Philippines — Nagping-it sa kasakit dihang naabtan sa Banat News ang siklista nga napunggit ug nadaro sa usa Sports Utility Vehicle nga gikan pa sab nakadumbol og laing pickup truck  diha sa MJ Quenco Ave. corner V. Gullas Street sa Barangay San Roque , siyudad sa Sugbo kagahapon sa hapon adlaw nga Sabado.

Ang driver sa maong SUV mao ang 20 anyos nga tinun-an  nga residente sa Barangay Dumlog sa Siyudad sa Talisay.

Samtang laing nadasmagan nga pickup truck gimaneho sa 47-anyos sab nga residente sa Barangay Maghaway sa siyudad sab sa Talisay.

Samtang ang naangol nga siklista nga napasok sa wala nga bahin sa ligid sa SUV mao si Mario Alvia Alvarado,45, residente sa maong barangay.

Matud pa sa drayber sa pickup kusog ang dagan sa SUV.

“Padung ko Carreta sa layo pa nakit-an nako siya kusog kaayo og dagan mao to papidpid nako daan nagtoo ko mohunong siya, nidasmag man gyud wala pa nako dut- i anhi jud sa atubangan maigo gyud,” matud niini.

Ang tinun-an miangkon nga nakatagpilaw siya samtang nagmananeho hinungdan sa disgrasya. “Gikan ko eskwelahan nakabanga ko og tawo,” matud niya sa Banat News.

Ang siklista nga si Alvarado nakaangkon og mga bun-og, pangos ug mga samad sa nagkadaiyang parte sa lawas.

Ang medical team sa Cebu City dali nga midala kaniya sa tambalanan, samtang gidala sa buhatan sa Traffic Police Unit ang duh aka drayber.

Ang tagtungod tinun-an gikatahong mipadayag nga ilang abagahon tanang galastuhan sa nahitabong aksidente.—  IBM BANAT NEWS