Dili na makighagwa pa ang uwan
Dili na kini susama kaniadto
Nga maabi-abihon. Dili na kini
Makigbugtaw sa atong talidhay.
Wala na siya’y gika-ikgan
Ilampurnas niya ang iyang
Kapungot sa yutang mapangahason.
Lunopan ang patag, banika lusno-on.
Dili na makigsandurot iyang mga lusok
Dili na kini susama kaniadto
Nga may sambog pakighadla. Dili na kini
Makigsuod sa atong mga pangandoy.
Wala na siya’y gikatak-an pa
Ibundak niya ang iyang
Kalampingasan nianang bukid nga tinunglo.
Tun-ason niya kini ug pulpogon.
Dili na makigginitikay ang iyang sinalibo;
Dili na kini ingon sa karaang panahon
Nga mainampingon. Dili na kini
Managana pagpukan sa atong mga tingusbawan.
Wala na siya’y gikahadlokan —
Ilambos niya ang iyang mga
Pagmahay sa katawhang mapasagaron.
Tumpagon tanan tang gipundar — gun-obon.
Dili na makig-angay pa iyang matag pat-ak
Sa dayon mihagtos iyang kamapailubon.
Kapungot gitamparos sa sapang naghaguros
Paminti’g maldisyon sa yanang gihapos.
Mag-usab pay layog!
Dili na siya makig-alayon pa
Ning katawhang walay pagtahod
Sa gipaambit niyang kadagaya.