Feasibility study sa Sugbohol Bridge Project giaprobahan

CEBU, Philippines — Giaprobahan sa Cebu Provincial Development Council (PDC) ang paglakip sa pre-investment ug feasibility study alang sa gisugyot nga SugBohol Bridge Project sa Provincial Development Investment Program sa lalawigan.

Gikondisyon usab sa PDC ang endorsement sa proposal ngadto sa Public-Private Partnership Center (PPPC) aron posibleng pondohan pinaagi sa Project Development and Monitoring Facility (PDMF).

Ang maong feasibility study nagtumong sa pagtino sa teknikal, pinansyal, ekonomikanhon, environmental ug uban pang aspeto sa proyekto una pa kini moabot sa construction ug investment stage. Matud ni Executive Assistant V Elizar Sabinay Jr., adunay mga pribadong sektor nga interesado na sa proyekto ug nakahimo na og unsolicited proposals, apan napugngan ang pag-uswag niini tungod sa kakomplikado sa pagpalambo sa maong imprastraktura.

Tungod niini, giingon ni Sabinay nga gipasulod sa probinsya ang direksyon nga ang gobyerno una ang mangita og pondo alang sa feasibility study aron mas dali nga makasulod ang pribadong sektor sa sunod nga yugto.

Sumala niya, ang papel sa pribadong sektor sa ulahi mao ang pag-invest ug pagpatuman sa imprastraktura kung mahimo nang ipatuman ang proyekto.

Ang feasibility study maglakip sa walo ka component, lakip ang project concept validation ug pre-feasibility assessment; engineering ug technical feasibility; traffic, economic ug regional development assessment; ug environmental ug climate-risk assessment.

Gilauman nga molungtad og usa ngadto sa duha ka tuig ang feasibility study tungod sa gilapdon sa mga aspeto nga kinahanglan susihon. Matud ni Sabinay, importante nga masugdan kini aron malikayan ang pag-usab-usab sa pagtuon kung mausab ang administrasyon.

Gikonsiderar sa probinsya ang PDMF sa PPP Center isip posibleng tinubdan sa pondo alang sa feasibility study. Sumala ni Sabinay, mas tukma kini nga pamaagi tungod kay adunay gitagana nga pondo alang sa feasibility studies, bisan pa nga kinahanglan pa kini moagi sa review ug approval.

Human sa PDC approval, ipadala sa probinsya ang resolusyon ngadto sa PPP Center aron hangyoon kini nga i-apil ang proposed SugBohol Bridge feasibility study ubos sa PDMF.

Ang SugBohol Bridge, o Cebu-Bohol Bridge, usa ka gisugyot nga 25-kilometro nga inter-island bridge nga gitumong sa pagpalig-on sa connectivity tali sa Cebu ug Bohol.

Ang unang mga plano naghisgot sa posibleng koneksyon gikan sa Cordova o Olango Island sa Cebu padulong sa Getafe, northern Bohol, ug posibleng ipatuman pinaagi sa public-private partnership. Ang proyekto unang gipaila niadtong 2016 ubos sa Build, Build, Build program apan wala nadayon tungod sa funding challenges.  MEL BANAT NEWS