Housing project sa Bogo City, Charter Day bonus gikwestyon

CEBU, Philippines — Nasuta sa Commission on Audit (COA) ang dagkong kakulangan sa pagpatuman sa National Housing Authority (NHA)-Yolanda Permanent Housing Program sa Bogo City ug ang padayon nga paghatag og Charter Day Bonus sa mga kawani sa siyudad niadtong 2025.

Matud sa COA, ang housing project nga nagkantidad og ?217.48 milyon ug gitumong nga makahatag og 750 ka housing units nagpabiling wala mahuman bisan pa sa paglapas sa gihatag nga revised completion period. Sa audit report sa COA nga gihimo niadtong 2025 apan bag-o lang gipagawas, nakita ang dugay nga pagkalangan sa proyekto, wala masulbad nga mga isyu sa yuta ug kontrata, ug kakulang sa dakong pisikal nga pag-uswag.

Matud sa COA, nakaabot na sa 522 ka adlaw ang delay sa contractor hangtod Disyembre 31, 2025, diin ang posibleng liquidated damages miabot sa ?113.52 milyon. Namatikdan usab niini nga ang ?32.62 milyon nga mobilization o advance payment wala pa mabawi. Girekomenda sa audit team nga ikonsiderar sa siyudad ang pagtapos sa kontrata, pag-forfeit sa performance security sa contractor, pagpatuman sa tukmang liquidated damages, pagbawi sa wala pa mabawing mobilization fee, ug pagsumiter sa mga dokumentong nagsuporta sa work suspensions ug updated nga status report sa proyekto.

Atol sa exit conference, miingon ang city accountant nga nakadesisyon na ang management nga tapuson ang kontrata tungod sa dugay nga pagkahunong ug kapakyasan sa pagkompleto sa proyekto.

Samtang, gikwestyon usab sa COA ang ?1.1495 milyon nga Charter Day Bonus nga gihatag niadtong 2025, nga matod niini gibayran atol sa dili milestone year ug walay igo nga legal nga basehan.

Matud sa COA, nakalapas kini sa mga probisyon sa Republic Act No. 6758 ug Local Budget Circular No. 65, nga naglimitar sa anniversary-related bonuses ngadto lamang sa milestone years. Miingon ang city accountant nga dili na ihatag ang maong bonus sa 2026 ug sa 2027 na hinuon kini ihatag. (BANAT NEWS)