Disgrasya sa Naga, babaye patay

CEBU, Philippines — Usa ka 29-anyos nga babaye ang namatay human naligsan sa truck sa usa ka aksidente sa Naga City, samtang upat ka sakyanan ang nagkabanggaanay sa laing insidente sa Mandaue City, gabii hangtod kaadlawon sa Agosto 31 ug Septiyembre 1, 2026.

Patay ang backrider sa motorsiklo human aksidenteng nalatayan sa usa ka Mitsubishi-Fuso truck sa National Highway, Barangay Langtad, City of Naga, Cebu, alas-4:00 sa kaadlawon sa Septiyembre 1.

Giila ang biktima nga si Michelle C. Fano, 29 anyos, residente sa Barangay Pit-os, Carcar City, Cebu. Siya ang backrider sa Honda Mio nga gimaneho ni Agapito G. Fano, 57 anyos, nga residente usab sa maong barangay.

Base sa inisyal nga imbestigasyon, pareho nga nagpadulong sa northbound ang Honda Mio ug Mitsubishi-Fuso truck. Ang motorsiklo anaa sa outer lane samtang ang truck anaa sa inner lane.

Pag-abot sa lugar, giingong nakaligis ang motor og libaong nga bahin sa kalsada, hinungdan nga nawad-an og kontrol ang drayber ug natumba ang motorsiklo.

Tungod niini, naligsan sa tuong likod nga ligid sa truck ang nahulog nga backrider. Gidala dayon ang driver ug backrider sa Naga Health Infirmary, apan si Michelle gideklarang dead on arrival ni Dr. Excel Jimms Roche.

Ang drayber sa Mitsubishi-Fuso nga si Genaro V. Tatoy, 68 anyos, residente sa Barangay Lagtang, Talisay City, Cebu, ug ang duha ka sakyanan gidala sa Naga City Police Station alang sa tukmang disposisyon.

Ang driver sa maong truck mag atubang og  kasong  Reckless Imprudence Resulting in Homicide and Physical Injury.

Karambola

Samtang, upat ka sakyanan ang nagkarambola  sa M.C. Briones Street, Basak, Mandaue City, alas-9:35 sa gabii niadtong Agosto 31.

Sumala sa Mandaue City Police Office, ang mga sakyanan nga nalambigit mao ang Isuzu Forward, Toyota Hilux, Toyota Raize, ug Ford Ranger.

Ang Isuzu Forward gimaneho ni Mario Dela Calzada Segara, 52 anyos; ang Toyota Hilux gimaneho ni Vincent Gealogo Echin, 46 anyos; ang Toyota Raize gimaneho ni Romnel Galariana Galan, 33 anyos; samtang ang Ford Ranger gimaneho ni Leo Enrico Lo Dela Torre, 63 anyos.

Base sa inisyal nga imbestigasyon, ang upat ka sakyanan nagbiyahe padulong sa Cebu City sa dihang giingong nadumbol sa Isuzu Forward ang likod nga bahin sa Toyota Hilux.

Tungod sa impact, natulod ang Hilux ngadto sa Toyota Raize, ug ang Raize napadulong usab sa Ford Ranger, nga miresulta sa sunod-sunod nga bangga.

Nakaangkon og kadaot ang upat ka sakyanan sa ilang atubangan ug likod nga mga bahin, lakip ang ubang bahin sa Hilux.

Wala'y gikataho nga namatay o naangol sa maong insidente. Ang mga drayber mismo miadto sa kapolisan aron i-report ang aksidente, ug gihimo ang dugang nga imbestigasyon alang sa tukmang disposisyon.

Ang driver sa Isuzo forward mag atubang og kasong  Reckless Imprudence Resulting in Damage to Property.

Padayon ang imbestigasyon sa kapolisan sa nahitabong duha ka insidente.—  Shiela Ma Agrabio/IBM BANAT NEWS