Daghan, dagkong buslot
Human nauwawan ang gobyerno sa kapakyas sa pagdakop ni Senador Bato dela Rosa (nagtago sukad Mayo 2026) ug sa mas unang nagtago nga silang kanhi kongresista Zaldy Co (sukad 2025), Atong Ang (sukad Enero 2026) ug Heneral Gerald Bantag (sukad Abril 2023), ikapasigarbo sa kapolisan nga nadakpan silang Senador Rodante Marcoleta ug kanhi Highways secretary Manuel Bonoan pila ka oras ra human naluwatan ang arrest warrant batok nila.
Pero ang problema wala mapriso kay naa pa sa ospital silang Bonoan (sukad Hunyo 1, 2026) ug Marcoleta (sukad Hulyo 6, 2026).
* * *
Ang kalangay sa pagpriso nilang Marcoleta (usa ka semana) ug Bonoan (usa ug tunga ka buwan) kalabwan lang sa pagyaka nilang kanhi House speaker Martin Romualdez (duha ka buwan) ug kanhi Senate president Chiz Escudero (upat ka buwan) sa unang hugna sa impeachment complaints batok ni Bise Presidente Sara Duterte.
Nagkataas ang lista sa mga sakit nilang Bonoan ug Marcoleta. Nga dili balidong rason sa ilang pagka-ospital. Kon si Bonoan dili pa suod ni Presidente Ferdinand Marcos Jr. ug kon si Marcoleta dili pa sakop sa Iglesia ni Cristo.
* * *
Mahimong mabalhog na si Marcoleta sa Quezon City Jail karong semanaha. Kon mapamatud-an sa mga doktor sa University of the Philippines-Philippine General Hospital nga nag-imbento ra og mga sakit ang mga doktor sa Philippine National Police General Hospital nga gidudahang kakonsabo sa senador.
Mas lisod prisuhon si Bonoan. Kay state witness na sa Ombudsman aron mapalig-on ang mga kaso batok ni Romualdez. Gipaabot na lang ang pagtugot sa Sandiganbayan nga bakwion ang mga kaso batok niya.
* * *
Wala g’yuy dag-anan ang mga gagmay. Dali rang ikiha, posasan, tanggungon, ug konbiktuhon. Bisan mangga ray gikawat o P5,000 rang para semento ang gibolsa. Pero kon dagko ug dato ang hingtungdan daghang buslot ang sistema sa hustisya.
Apil nang pagkahinog ug pagkahilaw sa kaso nilang Senador Joel Villanueva ug Escudero (kay gikinahanglan ang ilang boto sa impeachment trial) ug pag-dribol sa hagbay rang gipasidaan nga mga kaso ni Romualdez (aron dunay ikapanghambog si Marcos Jr. sa iyang State of the Nation Address karong Hulyo 27 nga nadutlan ang iyang ig-agaw sa kampanya batok sa flood scam).
- Latest
