Libug-libog ray dag-anan
Nakumbinser ang House panel of prosecutors nga walay klarong ebidensiya ug testigo nga mapakita si Bise Presidente Sara Duterte sa iyang turno sa Senate impeachment trial. Maong nabalaka nga ang nahibiling mga adlaw sa husay gamiton sa paglangay ug paglibog sa publiko aron makalimot sa kinakusgang mga ebidensiya batok sa sinumbong.
Maong gibakwi ang tulo sa upat ka articles of impeachment. Aron mapugos si VP Sara pagtubag sa nahibiling kaso sa hidden ug unexplained wealth. Kay lisod lubagon ang opisyal nga mga dokumento sa mga bangko ug ubang mga institusyon.
* * *
Gi-isnab ni VP Sara ang tulo ka kahigayonan sa pagpakita og mga dokumento nga manalipod niya gikan sa seryuso nga mga pasangil:
Sayop nga certification nga nangangkon sa youth summits sa Armed Force of the Philippines ra ang nahatag dihang gipangayoan og mga resibo ug katin-awan sa Commission on Audit sa gasto sa confidential funds;
Walay bisan unsang dokumento nga gisukip sa iyang tubag sa House Justice Committee niadtong Marso ning tuiga; ug
Pulos general denial ug technicalities ang unod sa tubag sa impeachment court niadtong Hunyo ning tuiga.
* * *
Kay unsay ebidensiya nga masumiter pagpanghimakak sa iyang kaugalingong hulga sa online press conference niadtong Nobyembre 24, 2024 nga nisugot nang gikasabot sa pagpatay nilang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romuladez?
Unsay mapakita nga mga dokumento nga mopasabot kinsa si Mary Grace Piattos; unsay labot sa bangko, lamesa, desktop computer, tambal ug pagkaon sa surveillance operations; ug unsay mga programang nilampos tungod sa confidential funds?
* * *
Paryente ni VP Sara nga si Retired Supreme Court Senior Associate Justice Antonio Carpio dunay daotang balita para niya: Napamatud-an na sa mga ebidensiya sa prosekusyon ang iyang hidden ug unexplained wealth.
Si Carpio, nga ig-agaw sa amahan sa iyang bana nga si Atty. Manases Carpio, nipasabot nga ang labing lisod tubagon sa depensa ni VP Sara, bisan pa kon makakita sila og forensic expert nga mohimo og sukwahi nga hubad sa mga dokumento sa prosekusyon, mao ang minilyon ka pesos sa iyang bank accounts nga wala malista sa iyang statements of assets, liabilities and net worth (SALNs).
* * *
- Latest
