“Karaang kansyon”

Nindot unta og dili kay kutob ra sa paghatag og kamandoan si Cebu City Mayor Nestor Archival ngadto sa kapolisan nga mohingusog sila sa paghimo’g kampanya batok sa mga illegal nga sugal dinhi sa siyudad.

Ubos man gyud sa imong supervision ang mga polis, pangayoi sila kanunay og accomplishment reports, unya ang mga kahon nga gigamit isip ticket booth sa mga illegal swertres operators, anha ipahatud sa City Hall.

Pinaagi sa pag-monitor kanunay sa accomplishment sa kapolisan, mapugos sila sa pagtinuod sa paghimo’g kampanya. Dili ikalimod nga pwerteng daghana nga mga illegal swertres booth dinhi sa siyudad, ug bisan na sa ubang mga dapit sa probinsya.

Alang sa mga amigo nako nga opisyal sa kapolisan, ayaw na ninyo paabota nga maigo mo sa gitawag og “One Strike Policy” ug mahisama kamo sa mga opisyal sa kapolisan sa Negros Oriental nga gipangrelibohan sa katungdanan ug giimbestigar.

Gimandoan ni Mayor Archival si Cebu City Police Office (CCPO) director, Colonel Ricky C. Sumalde, nga paspasan gyud ang kampanya batok sa mga ilegal nga sugal.

Ang mga legal nga outlet sa swertres mao kanang konektado direkta sa Philippine Charity Sweepstakes Office.

* * *

Ang mga politiko basta mag-atubang og kaso, mogawas gyud nga may mga sakit sila, pero dili ra kana kabalak-an kay dungan ra na nga mawala kon makagawas na sila sa priso

Pastilan no, nahimo na lang gyud nga kataw-anan kay sagad sa mga politiko nga madakpan tungod sa lainlaing kaso, mangangkon dayon nga duna sila’y mga sakit.

Aw, si kanhi Presidente Gloria Macapagal Arroyo bitaw, dihang gikiha og gimandoan na nga tanggongon sa prisohan, nagpabutang man dayon og “laki-laki” sa iyang liog ug didto ra sa hospital mag-estar. Dayon si kanhi Presidente Joseph Estrada. Mao nga gisundog sab kini nilang Senador Jinggoy Estrada ug ni Senador Rodante Marcoleta, nga pulos sab kuno sila dunay mga sakit.

Si Estrada nagsungkod nga miadto sa Sandiganbayan ug gisagakay pa sa iyang mga alalay, samtang si Marcoleta duna sab kuno’y sakit. May nangutana nako kon ngano man ni?

Akong giingnan ang nangutana nga dili ra mabalaka kay kon may kamandoan nga dili na mapriso ang maong mga opisyal, dungan ra nga mawala ang ilang mga sakit.

Aw, suma’a gud, nakakita pa ba kamo ni kanhi Presidente Arroyo nga nagbutang og laki-laki sa iyang liog? Naayo na.tua

Bitaw, ako igo na lang mopahiyom kon dunay mga politiko nga mangangkong masakiton human sila gidakop.