DOH: Leptospirosis, sumisirit

MANILA, Philippines — Patuloy ang pagtaas ng mga naitatalang kaso ng leptospirosis sa bansa, dulot ng mga pagbahang hatid ng habagat nitong mga nakalipas na linggo.

Ayon kay Dr. Marc Steven Capungcol, hepe ng DOH Health Emergency Management Bureau, mula Agosto 2-29 ay nakapagtala ang ahensiya ng 77% pagtaas ng leptospirosis cases mula sa nakalipas na dalawang linggo.

Mula Enero hanggang Agosto 29 naman, umabot na sa 6,253 ang leptospirosis cases kabilang ang 378 deaths.

Sa Metro Manila, nasa 1,961 ang kaso ng leptospirosis.

Ayon kay Capungcol, ang Maynila at Quezon City ang may pinakamataas na cumulative number ng mga kaso, na sinundan ng Caloocan at Taguig.

Una na ring pinayuhan ng DOH ang publiko na umiwas sa paglusong sa baha na maaaring kontaminado ng ihi ng daga, na naghahatid ng leptospirosis.