Nanghadlok nangadakpan

CEBU, Philippines — Nadakpan sa kapulisan ang duha ka mga indibidwal nga gasige og gamit sa social media aron manghadlok ug manghulga nga atakihon ang mga eskuylahan.

Unang nadakpan ang 20-anyos nga culinary graduate human giingong nanghulga gamit ang TikTok livestream batok sa usa ka pribadong unibersidad sa Cebu City.

Giila sa kapulisan ang suspek sa alyas nga “Clarence,” residente sa Barangay Tabok, Mandaue City. Nadakpan siya duh aka adlaw human sa iyang TikTok livestream.

Nadakpan siya sa Purok Mangga, Barangay Altavista, Poro, Camotes Island atol sa hot-pursuit operation nga gipangulohan sa team ni Police Major Jade Campo Sumugat, acting chief sa Pari-an Police Station 1.

Gikatahong nanghulga siya sa comment section nga moadto kini sa usa ka unibersidad sa Cebu City ug mamusil.  Ang maong comment nag-ingon: “Mag school shooting ko ara ugma.”

Usa ka estudyante sa maong unibersidad ang nakakita sa comment ug nangayo dayon og tabang sa Pari-an Police Station ug sa PNP Anti-Cybercrime Unit.

Nasubay sa kapulisan ang nahimutangan sa suspek  nga toa siya sa Camotes Island hinungdan nga gipangita siya didto hangtud nga nadakpan.

Bantayan

Samtang gidakop sab ang usa ka 21-anyos nga lalaki human sad kini  nanghulga ug nanghadlok pinaagi sa online messages  nga naay pagpamusil nga mahitabo diha sa Bantayan National High School-Senior High School.

Agosto 19, 2026 sa dihang na-report sa kapolisan sa staff member sa Bantayan National High School-Senior High School ang maong hulga.

Nasubay iyang nahimutangan ug gidakop dayun sa mga sakop sa Bantayan Municipal Police Station alas 11:30 sa buntag kagahapon.

Basi sa nakuha nilang impormasyon sagunson nga messages ang gipadala niini sa usa ka indibidwal bahin sa hulga, giawhag sab kini niya nga pasultihan ang gwardiya ug ubang estudyante bahin sa posibleng pagpamusil nga mahitabo ug gitambagan kini nga dili nalang paeskuylahon karong adlawa (Biyernes).

Giinsister pud niya nga dili komedya ang iyang pasidaan. Ang kapolisan daling nilusad og imbestigasyon ug na-trace ang suspek hinungdan nga kini nadakpan.

Kalapasan nga Grave Threat and Unjust Vexation in relation to Republic Act No. 10175, o ang Cybercrime Prevention Act of 2012.

Ang seryusong pagpanakop sa mga polis sa mga tawong nagsige og panghulga ug panghadlok, tubag ni sa daghang sagunsong mga bayolenteng panghitabo sa nagkadaiyang mga tunghaan dinhi sa nasud, apil sad ana ang mga pagpanghulga nga gipaagi sa social media.

Niadto lang Agosto 18, duha ka estudyante ang sa Ateneo de Zamboanga Junior High School sa Zamboanga City ang namatay. Usa sa namatay mao ang suspek nga giingong nahikog human niya nabuhat ang krimen. (BANAT NEWS)