EDITORYAL — Seryusong inspeksyon

Sa mga nakalabay nga mga bayolenteng panghitabo sa mga eskuylahan, daw nahutdan na og laing opsyon ang mga otoridad kung unsaon pagsiguro ang kaluwasan sa mga tinun-an ug mga magtutudlo.

Usa sa gihisgotan karon sa Department of Interior and Local Government kauban ang Department of Education nga buot  nilang buhaton mao ang pagbutang na gyud og barangay tanod outpost sa sulod na gyud mismo sa mga eskuylahan. Para daw makatabang sa pagbantay sa sulod sa mga eskuylahan. Usa pa, gikatahong mas nasuhito daw ug naay kasayuran ang mga tanod sa mga tinun-an diha sa ilang lugar.  Gawas sa naandang mga sinuholang mga pribadong security guards nga tigbantay sa mga gates ug tig-roving sa sulod, mapun-an gyud ang makabantay sa mga bata ug sa mga magtutudlo.

Naa nasay mga eskuylahan nga nagplanong magpalit og metal detectors, kulang nalang magbutang og x-ray machine para makita ang sud sa mga bag sa mga estudyante.

Daan ng gimandoan ang kapolisan nga pun-an ang ilang presensiya sa palibot sa mga eskuylahan aron makaresponde dayun kun dunay mahitabo, ug ang presensiya palang nila sa lugar makatabang na pagsanta sa mga tawong o mga estudyanteng dunay dautang tuyo.

Pagmatuod niini, kadtong mga nangaging mga bayolenteng insidente sa sulod sa mga eskuylahan diin naa gyuy mga estudyanteng nakalas.

Kagahapong adlawa, naay 14-anyos nga estudyante sa Pinamungajan nga nasakpang nagdala og armas sa sulod sa iyang bag. Nasakpan siya sa iyahang magtutudlo nga naghimo og kinalit nga bag inspection.

Nagpasabot kini nga naa gyuy deperensiya sa pagpatuman sa seguridad ang mga gwardiya diha sa entrada o kung kinsa may gabantay.

Gani, kadtong nahitabo sa Zamboanga,  wala na giinspeksyon ang estudyanteng namusil kay gihatud kini og pribadong sakyanan ug walay nakaako og inspeksyon sa iyahang gidala maong nakasulod gyud ang maong mga armas.

Pero una sa tanan, kaning gustong mobuhat og krimen, apil na mga menor de edad niini, ilaha gyud ning mabuhat bisan pa man sa kadaghan sa nagbantay. Pero kun sa entrada palang seryusohon ang pag-inspeksyon wa gyud untay makalusot.