Klase sa Malabon National High School sinuspinde
Sa banta ng pamamaril
MANILA, Philippines — Sinuspinde kahapon ang klase sa Malabon National High School (MNHS) matapos makatanggap ng report na mayroong banta ng pamamaril sa bawat baitang.
Bilang pag-iingat at matiyak ang kaligtasan ng lahat, pinayagan nang umuwi ang mga estudyante habang nananatili ang mga operatiba ng Philippine National Police (PNP) sa loob at paligid ng paaralan.
Ayon sa pinapakalat na screenshot online, magkakaroon ng pamamaril sa paaralan sa bandang alas-2:30 ng hapon kahapon kung saan target ang mga mag-aaral sa Grade 7, 8, 9, 10, 11, at 12.
Wala pang opisyal na pahayag ang (MNHS) patungkol dito, ngunit agarang umaksyon ang Pamunuang Brgy. Hulong Duhat upang kumpirmahin ang banta ng pamamaril.
Sa kasalukuyan, wala pang kumpirmasyon kung tunay ang naturang banta. Hinihikayat naman ang publiko na iwasang magpakalat ng hindi beripikadong impormasyon at agad na iulat sa mga awtoridad ang anumang detalye ukol dito.
Tinitiyak din ng mga kinauukulan na ang sinumang mapatutunayang responsable sa pagpapakalat ng fakenews ay pananagutin sa batas.
- Latest
