Missing si VP Sara
Dul-an tulo ka adlaw na human sa makalilisang nga linog sa Mindanao–nga sa kataposang ihap nakapatay og 41, nakaangol og gatosan ug nakaguba sa kabalayan, mga eskuylahan, kadalanan ug mga taytayan sa unom ka rehiyon–wala pa gihapon igkita ug wala pa gani madunggi ang mga Duterte.
Wala pa mahibaw-i hangtod sa akong pagsuwat niini kon hain si Bise Presidente Sara Duterte. Gikataho nga tua sa The Hague kay niduaw sa iyang amahan si Kongresista Paolo Duterte. Ug mga kasayuran sab nga tua sa China si Davao City Mayor Baste Duterte.
* * *
Daghang sulti ang mga Duterte sa mga kontrobersiya: Si VP Sara nipublikar sa iyang suwat ni Kiko Barzaga nga gipalagpot sa House of Representatives; si Pulong nipasangil nga gimaniobra ni Presidente Ferdinand Marcos Jr. aron mabasura ang tanang ill-gotten wealth cases sa ilang pamilya; ug si Baste niawhag sa taga Davao City pagdam-ok sa ilang basura sa upisina sa Department of Environment and Natural Resources nga nitak-op sa ilang sanitary landfill.
Pero walay mensahe para sa mga biktima sa katalagman. Walay bisan usa na lang ka post sa Facebook.
* * *
Ang Office of the Vice President Facebook page mao ray dunay post nga konektado sa linog: Mga letrato sa ilang Kalusogan Food Truck sa General Santos City. Dili para sa mga biktima. Kon dili para sa mga polis. Naletratohan ang kape, asukar, tubig init, paper cups ug kahon nga gimarkahan og food item.
Gawas sa post niadtong gabii sa Hunyo 8, wala nay lain. Walay notisya duna bay dugang mga operasyon sa pagtabang.
* * *
Bahaw ang kataposang mga post ni VP Sara: Pagbisita sa Baybay, Leyte sa niaging semana ug sa Cotabato sa niaging buwan. Niduaw siya sa amihanang Sugbo human sa linog sa niaging tuig. Ambot nganong wala pakita sa iyang kaugalingong tugkaran. Dili lang aron paghatag og tabang kon dili aron pagpasalig sa katawhan nga dili sila pasagdan ug nga makabangon ra sa ilang pagkapukan.
Dili kini unang higayon sa iyang pagpili sa pagpakahilom. Ug pagpalayo. Sa Hulyo 2024, dihang nalumos ang Metro Manila sa grabeng baha, gipalabi niya ang paglarga paingon sa Germany. Aron pagtan-aw sa konsiyerto sa iyang paboritong si Taylor Swift.
* * *
- Latest
