Road Warriors lusot sa Fuel Masters
MANILA, Philippines — Sinagasaan ng NLEX ang Phoenix, 100-95, para sa kanilang ikalawang sunod na arangkada sa Group B sa PBA Season 49 Governors’ Cup kahapon sa Smart Araneta Coliseum.
Kumolekta si import Myke Henry ng 37 points at 9 rebounds para tulungan ang Road Warriors sa pagpoposte ng 2-0 record at inihulog ang Fuel Masters sa 0-2 marka.
Halos nasayang ang itinayong 23-point lead ng NLEX sa halftime matapos unti-unting makalapit ang Phoenix sa likod nina import Jayveous McKinnis, Tyler Tio at RR Garcia sa third period.
“During that stretch we really lost our composure, we lost our defensive groove, we lost everything, and they pounced on that,” wika ni coach Jong Uichico. “We we’re struggling on the bench, what to do, what was wrong.”
Ang dalawang free throws ni McKinnis ang nagdikit sa Fuel Masters sa 42-56 bago isara ng Road Warriors ang nasabing yugto sa 76-67.
Tuluyan nang naagaw ng Phoenix ang bentahe sa 85-84 mula sa drive ni Jayvee Mocon sa 6:39 minuto ng fourth quarter hanggang mabawi ng NLEX ang 96-93 kalamangan sa huling 1:18 minuto.
Huling naghamon ang Fuel Masters sa 95-96 matapos ang layup ni Garcia sa nalalabing 30.1 segundo kasunod ang three-point shot ni Robbie Herndon sa natitirang 19.5 segundo para ilayo ang Road Warriors sa 99-95.
Kapos ang tangkang four-point shot ni Jayjay Alejandro sa posesyon ng Phoenix na nagresulta sa isang free throw ni Henry sa huling 7.5 segundo para sa 100-95 abante ng NLEX.
Kasalukuyan pang naglalaro ang San Miguel (1-0) at Blackwater (0-2) kagabi habang isinusulat ito kung saan nakatakdang palitan ng Bossing si import Ricky Ledo.
- Latest
