Ginang na nam-bully, tinaga ng lalaking kapitbahay

MANILA, Philippines — Isang 35-anyos na ginang ang malubhang nasugatan nang siya ay pagtatagain ng 35-anyos na lalaking kapitbahay na umano ay binu-bully nito naganap nitong Huwebes sa Brgy. Potrero, Malabon City.

Batay sa ulat, bandang alas-10:15 ng umaga ay naglalakad ang biktima karga ang kaniyang 3-anyos na pamangkin sa Doña Juana Road  nang biglang sumugod sa likod ang suspek at walang kaabog-abog na pinagtataga gamit ang 13-pulgadang butcher knife.

Nagtamo ang biktima ng  malalalim na dalawa o tatlong hiwa sa batok, sugat sa likod ng balikat, dalawang hiwa sa braso, at dalawang hiwa sa likod ng tainga.

Ayon sa naarestong suspek sa pulisya na nagawa niya ang krimen dahil hindi maganda ang pagtrato sa kaniya ng biktima.

Sinasabing madalas na ma-bully ng biktima ang suspek bagay na mariing itinanggi ng pamilya ng huli.

Kakasuhan ang suspek ng frustrated murder at child abuse dahil sa trauma na idinulot ng insidente sa batang pamangkin.