Mga grupo, pinuri LTFRB sa P555.75milyong multa sa Move It

MANILA, Philippines — Pinuri ng ilang consumer, transport at motorcycle rider groups ang desisyon ng Land Transportation Franchising and Regulatory Board (LTFRB) na multahan ng P555.75 milyon ang Move It dahil sa umano’y sobrang bilang ng riders na lampas sa itinakdang allocation.
Ayon sa LTFRB, may 73,321 aktibong rider ang Move It kahit 17,746 lamang ang awtorisado, o sobrang 55,575 riders.
Kabilang sa mga sumuporta sa hakbang ang National Confederation of Tricycle Operators and Drivers Associations of the Philippines (NACTODAP), National Public Transport Coalition (NPTC), Digital Pinoys, Lawyers for Commuters’ Safety and Protection (LCSP), Kapatiran ng Dalawang Gulong (KAGULONG), Motorcycle Taxi Rider Organization (METRO), at PASADA CC.
Iginiit ng mga grupo na mahalagang mapanatili ang kaligtasan ng mga commuter at matiyak na ang lahat ng rider ay wastong na-screen at nasanay. Anila, hindi dapat maisantabi ang commuter protection para lamang matugunan ang demand.
Sinabi rin ng mga rider organizations na hindi dapat sisihin ang mga rider sa mga desisyong ginawa ng pamunuan ng kumpanya kaugnay ng onboarding.
Anila, ang kumpanya ang dapat managot kung napatunayang lumampas ito sa pinahihintulutang bilang ng riders.
Nangako naman ang mga grupo na babantayan ang susunod na hakbang ng LTFRB at Department of Transportation sa pagpapatupad ng multa.
- Latest



















