Ex-acting Mayor ng Cebu, pinagmulta ng Ombudsman sa sabong

MANILA, Philippines — Pinagmulta ng Office of the Ombudsman si dating Cebu City acting Mayor Raymond Alvin Garcia dahil sa mga hindi awtorisadong sabong sa isang casino sa Cebu City.

Ayon sa Ombudsman, napatunayang may pananagutan si Garcia sa pag-uugaling nakasisira sa pinakamahusay na interes ng serbisyo.

Anim na buwan ang suspension ni Garcia dahil sa pagsasagawa ng sabong, pero dahil wala na siya sa posisyon ay pinalitan na lamang ang parusa ng multa na ka­singhalaga ng anim na buwang pangunahing suweldo, na maaaring ibawas sa kanyang mga benepisyo sa pagreretiro, naipon na mga kredito sa bakasyon, o iba pang naghihintay na pondo.

Ang desisyon ng Ombudsman ay batay sa reklamo na isinampa rito ng isang nagngangalang Kristian Hassamal, na kinuwestiyon ang mga sabong derby sa isang hotel at casino noong Mayo 23 hanggang 24, Agosto 27 hanggang 29, at Oktubre 11 hanggang 18 sa taong 2024.

Sinabi ng Ombudsman na ang mga aktibidad ay lumabag sa Presidential Decree No. 449 o ang Cockfighting Law ng 1974, na naglili­mita sa sabong sa mga awtorisadong lugar at lisensyadong sabungan, at naglilimita sa mga espesyal na pribilehiyo sa sabong sa mga tinukoy na okasyon at tagal.

Nakasaad din sa desisyon ng Ombudsman na ang mga aktibidad sa sabong ay maaari lamang palawigin ng isang beses lamang, sa loob ng panahong hindi lalampas sa tatlong araw, sa loob ng isang taon sa isang lalawigan, lungsod, o munisipalidad.

Ang kapwa akusado naman ni Garcia na si dating Cebu City Police Director na si Antonietto Canete, ay inilipat ang pagdedisyon sa Ombudsman-Military and Other Law Enforcement Offices para sa kaukulang aksyon.