Durugista nasakmitan og shabu, armas sa RPDEU-7
CEBU, Philippines — Nikabat ngadto sa 100 gramos nga shabu nga nikantidad tanan ngadto sa ?680,000 ang nasakmit atol sa anti-drug operation sa kapolisan diha sa Barangay Guadalupe, Dakbayan sa Sugbo niadtong Lunes sa hapon.
Nasikop sa mga operatiba sa Regional Police Drug Enforcement Unit (RPDEU)-7 atol sa operasyon si Jerome Labra Saballa, 52, lumulupyo sa Banawa, Barangay Guadalupe niining siyudad.
Gawas sa ilegal nga drugas nasakmit usab sa mga otoridad ang usa ka kalibre .45 nga pistola, tulo ka bala, magasin ug itom nga sling bag.
Matud sa kapolisan nga usa ka semana nila’ng gibantayan ang suspetsado sa wala pa gilusad ang operasyon.
Base sa inisyal nga impormasyon sa kapolisan giingong matag semana mokabat sa 100 ngadto sa 200 gramos nga shabu ang ma-dispose sa suspetsado sa Barangay Guadalupe ug kasikbit nga mga barangay.
Nasayran nga nalambigit na usab ang suspetsado sa mga kaso nga frustrated murder niadtong 2004 hangtud sa 2012 ug paglapas sa Section 11 sa Akta Republika t 9165 kun “Comprehensive Dangerous Drugs Act of 2002” niadtong 2014 hangtud sa 2023. BDB BANAT NEWS
- Latest















