Inter-BPO pickleball tournament kasado na

CEBU, Philippines — Andam na ang tanan alang sa labing unang Kayu Inter-BPO Pickleball Tournament nga ipahigayon karong Nobyembre 16 sa Portside Courts atbang sa Robinsons Galleria Cebu.

“Tumong sa maong kalihokan nga hatagan ang mga partisipante og makalingaw ug makapadasig nga plataporma aron mapakita ang ilang kahanas, makahulma og maayong relasyon, madasig ang himsog ug aktibong pagkinabuhi ug mapalig-on ang panaghiusa sulod sa Business Process Outsourcing (BPO) community pinaagi sa mahigalaong kompetisyon,” matod ni Kayu chairman Harrison Go.

“Sa kinatibuk-an, tumong usab sa torneyo nga mapalambo ang panaghiusa, kooperasyon ug maayong balanse tali sa trabaho ug personal nga kinabuhi samtang maghatag og makalingaw ug halandumong kasinatian sa sports sa tanang partisipante,” dugang ni Go.

Tulo ka kategoriya ang kumbatihan sa torneyo: men's doubles, women's doubles ug mixed doubles.

Walo na ka teams ang mikumpirma sa ilang pag-apil. Kini ang Xignex Digital Solutions, JustPressOne International, ContactPoint360 Stallions, Stark BPO Services, Sentria, Evo Tech, Fusion CX ug Emata.

Aduna usab laing upat ka kompanya nga mipadayag sa ilang interes nga mopakita'g aksiyon.

Si Go nagkanayon nga 20 ka teams ang target nila nga moapil sa kompetisyon.

Ang kataposang adlaw sa rehistrasyon gitakda sa Nobyembre 10. Kadtong gustong mosalmot mahimong mokontak ni tournament commissioner Jano Macahasa sa 0998-2046014.

Ang kampiyon sa matag karegoriya mobulsa og P5,000, samtang ang mopahiluna sa ikaduha ug ikatulong dapit makadawat og P3,000 ug P2,000.