DOH: “Healthcare must extend beyond hospital walls,”

CEBU, Philippines — Nagpahibalo ang Department of Health Central Visayas Center for Health Development (DOH-CVCHD) nga motabang sila mangita og solusyon aning mga tagtungod sa mga pasyente sa Vicente Sotto Memorial Medical Center (VSMMC) nga anha na mangligdas sa aseras sa dalan B. Rodriguez sa gawas sa maong tambalanan.

Gusto sa DOH nga makig-alayon sa nagkalain-laing mga local government units (LGUs).

Sa pamahayag sa DOH-CVCHD, nakahibalo sila bahin anang mga bantay sa pasyente nga anha mangatulog sa gawas sa VSMMC, naladlad sa init sa adlaw, ulan ug uban pang kahimtang sa panahon.

Nigamit lang og karton aron maoy ilang higdaanan samtang naghulat sa ilang mga paryente nga naospital. Gikan sila sa nagkalain-laing mga kalungsoran sa probinsya sa Sugbu, naay uban gikan sa Bohol, Siquijor ug Negros island.

Kay diha man sila nangatulog sa aseras, nagpasabot ni nga wala silay mga paryente sa Cebu City para makapasilong.

Giila sad sa DOH-CVCHD nga gikinahanglan og mga polisiya sa ospital aron mapanalipdan ang mga pasyente ug malikayan ang paghuot sa sulod sa pasilidad apan kinahanglan usab nga hatagan og pagtagad ang kaayohan ug dignidad sa mga pamilya sa pasyente.

Matud sa DOH-CVCHD kinahanglang pangitaan og praktikal ug tawhanong solusyon lakip ang posibilidad nga temporaryong kapuy-an o halfway house alang sa mga bantay sa pasyente nga walay laing kapuy-an dinhi sa Cebu City.

Makigkoordinar usab ang DOH-CVHD sa Cebu City Government, mga LGUs diin nagpuyo ang mga apektadong bantay, ug mga social welfare partners aron makahimo og referral mechanism ug makakonektar sa mga pamilya ngadto sa mga programa nga makatabang sa ilang sitwasyon.

Tumong niini ang pagpangita og malungtarong solusyon pinaagi sa inter-agency coordination imbes nga magbinasolay ug manghunaw sa kasaypanan.

“Healthcare must extend beyond hospital walls,” matud sa DOH, dugang sa pag-ingon nga ang mga pasyente ug ilang pamilya angay tratuhon nga dunay dignidad, kalooy ug tawhanon.

Ang mga patient watchers mao ang mga sakop sa pamilya o kauban nga nagpabilin duol sa ospital aron motabang sa adlaw-adlaw nga panginahanglan sa pasyente, ilabina kun dunay ipapalit nga tambal og gamitonon sa pasyente nga wala sa botika sa VSMMC. — /IBM (BANAT NEWS)