Bulk Water System sa Danao nag-operate nga walay permit sa DOH ug NWRB

CEBU, Philippines — Gitumbok sa Commission on Audit (COA) ang ?418.65 milyones nga Bulk Water System sa Dakbayan sa Danao tungod sa pag-operate niini nga walay gikinahanglang mga permit gikan sa Department of Health (DOH) ug National Water Resources Board (NWRB).

Base sa 2025 audit report sa COA, nahuman ang sestema niadtong Disyembre 2021 apan wala makakuha sa DOH Operational Permit ug NWRB Water Permit sa unang mga tuig sa operasyon niini.

 Usa lang ka Sanitary Permit ug Certificate of Potability ang gisumite sa city government ngadto sa COA.

Ang Sanitary Permit giisyu niadtong Marso 17, 2025 ug matud sa COA nga “New” ang marka nga nagpakita nga wala kini maong permit sa unang tulo ka tuig sa operasyon ug na-expired usab kini niadtong Disyembre 31, 2025.

Gipasabot sa city management gipadagan dayo nila ang sestema tungod sa dinaliang panginahanglan sa suplay sa tubig samtang nalangan ang pagkompleto sa mga teknikal ug regulatory requirements.

Matud sa COA nga kinahanglan dayon masiguro sa siyudad ang DOH Operational Permit ug NWRB Water Permit aron malikayan ang regulatory sanctions ug posibleng pagkabalda sa importanteng serbisyo sa tubig.

Niuyon ang city government sa rekomendasyon sa COA ug nagkanayon nga nagproseso na kini sa gikinahanglang mga permit. BDB BANAT NEWS